Namangan viloyatining Uchqo‘rg‘on tumanidagi Qayqi qishlog‘ida yoz chillasida dovuchcha tugadigan o‘riklar yetishtirilmoqda. Bu haqda “Daryo” muxbiri Azizbek Abduvaliyev xabar bermoqda.
Bunday o‘rikka qishloqning “Navbahor” mahallasida yashovchi Arabboy Hayitov xonadonida duch keldik.
Foto: Jahongir Akramov
“Farg‘onalik yigitlar sakkiz yil avval qishlog‘imizga kelib, kechpishar olma, o‘rik, shaftoli va nok ko‘chatlarini berib ketishgandi. Biz ham xarid qildik. Bu ko‘chatlardan ayniqsa o‘rik yaxshi avj olib ketdi. Uning navini aniq bilmayman, kimdir ‘Dovon o‘rigi‘, kimdir yana boshqa nom bilan ataydi”, — deydi Arabboy aka.
Arabboy Hayitov
Foto: Jahongir Akramov
Bu o‘rik ham boshqa navlar kabi bahorda gullaydi. Yozda dovuchcha tugib, kuzda, oktabr oyining o‘rtalariga borib pishib, yetiladi.
“O‘rigimiz hasharotlarga chidamli, shira tushmaydi. Eng asosiysi, juda hosildor, taʼmi ham ajoyib. Kuzda yo‘lingiz Namanganga, Qayqiga tushadigan bo‘lsa, xonadonimizga keling, o‘rikxo‘rlik qilamiz”, — deydi Arabboy aka.
Xonadon sohibining aytishicha, o‘rikning bu naviga talabgorlar ortib bormoqda. Ulardan biri kechpishar o‘rik shoxlaridan qalamcha olib, bog‘idagi mingga yaqin ko‘chatga ulash istagini bildirgan.
Izoh (0)