Toshkent viloyati Nurafshon shahridagi tug‘uruqxonada homilador ayol chaqalog‘i bilan vafot etdi. Bu haqda Bosh prokuratura axborot xizmati “Daryo”ga ma’lumot berdi.
Unga ko‘ra, 1995-yilda tug‘ilgan S.Q. murojaat qilib, unda Toshkent shahar, Bektemir tumani, “Binokor” mahallasi, raqamsiz uyda ro‘yxatda turib, vaqtincha O‘rta Chirchiq tumani, “Gulobod” MFY, Charog‘on ko‘chasi, 28-uyda yashovchi opasi — 1993-yilda tug‘ilgan M.D. 9 oylik homilasi bilan Nurafshon shahar Tibbiyot birlashmasi tug‘uruq bo‘limida vafot etganini maʼlum qilgan.
Aniqlanishicha, 2023-yil 14-iyul kuni soat 06:45 da Toshkent viloyati O‘rta Chirchiq tumani hududida joylashgan 53-sonli oilaviy poliklinikada ro‘yxatda turgan M.D.ni singlisi S.Q. Toshkent shahar Bektemir tumani hududidagi uyidan 3-homiladorlik, 38 hafta, 2-tug‘ish o‘tkir ichak infeksiyasi sepsis, septik shok, gipovalinik shok, isitmasi yuqori holatdagi tashxisi bilan olib kelgan.
Nurafshon shahar tibbiyot birlashmasi tomonidan olib borilgan tibbiy muolajalarga qaramay, M.D. 14-iyul kuni soat 08:10 da vafot etgan. Hozirda Nurafshon shahar prokuraturasi tomonidan uning o‘limi holati bo‘yicha tergovga qadar tekshiruv harakatlari olib borilmoqda.
Izoh (0)