Ipakchilik va jun sanoatini rivojlantirish qo‘mitasi raisi Bahrom Sharipov “Kun.uz” va uning jurnalisti Shokir Sharipovni sudga berdi, biroq keyin suddan ishni ko‘rmasdan qoldirishni so‘radi.
12-iyun kuni nashr jurnalist Shokir Sharipovning “Davlat amaldorining ‘ipakdan to‘qilgan’ biznes to‘ri. Soha shaxsiy tomorqaga aylantirilganmi?” sarlavhali surishtiruvini e’lon qilgandi. Unda Ipakchilik qo‘mitasi raisi, yaqingacha qo‘mita bilan birga “O‘zipaksanoat”ni ham boshqarib kelgan Bahrom Sharipov o‘ziga aloqador ko‘plab kompaniyalar orqali ipak sanoatida shaxsiy biznesni yuritayotgani aytilgan. Maqolada Bahrom Sharipovning biznes tuzilmalari asosini uning turmush o‘rtog‘i hisoblangan Sayyora Sharipova nomiga ochilgan firmalar tashkil qilishi qayd etilgan.
“Ipakchilikka mas’ul qo‘mita va uyushma vakillari biz bilan uchrashuvda Bahrom Sharipov aslida tadbirkor bo‘lgani, ipakchilik yo‘nalishida tadbirkorlik faoliyati bilan soha rahbarligiga kelgunga qadar ham shug‘ullanganini ma’lum qildi. Ammo surishtiruvda tug‘ilgan savollarga javob berilmadi”, — deyiladi Shokir Sharipov maqolasida.
Shundan so‘ng Ipakchilik va jun sanoatini rivojlantirish qo‘mitasi raisi “Kun.uz” va uning jurnalisti Shokir Sharipovni sudga berdi.
“Gazeta.uz”ning yozishicha, u o‘z da’vo arizasida “Kun.uz” maqolasidagi ma’lumotlarni asossiz deb atadi hamda bu o‘zi va oilasining obro‘siga putur yetkazganini qayd etdi. Ta’kidlashicha, u tasodifan Ipakchilik va qorako‘lchilikni rivojlantirish qo‘mitasi rahbari hamda “O‘zipaksanoat” uyushmasi raisi lavozimlariga tayinlanib qolmagan.
Bahrom Sharipov sudlanuvchilardan raddiya e’lon qilish, omma oldida kechirim so‘rash hamda “Kun.uz” va jurnalist Shokir Sharipovdan ma’naviy zarar uchun 1 milliard so‘m undirishni talab qilgan.
Bloger va huquqshunos Xushnudbek Xudoyberdiyev 14-iyul kuni Bahrom Sharipov sudga berilgan daʼvo arizasini qaytarib olganini ma’lum qilib, uning sudga yuborgan arizasini ilova qildi.
Unda Ipakchilik qo‘mitasi raisi Bahrom Sharipov “Kun.uz” nashri va jurnalist Shokir Sharipov ustidan shaxsning shaʼni, qadr-qimmati va ishchanlik obro‘sini himoya qilish yuzasidan sudga berilgan daʼvo arizasini qaytarib oldi va suddan ishni ko‘rmasdan qoldirishni so‘ragan.
Izoh (0)