Andijondagi tergov hibsxonasida 12 nafar IIB xodimi tomonidan urib o‘ldirilgani aytilgan marhum Sanjarbek Mamajonovning onasi Yulduzxon Sultonova sudyalardan o‘g‘lining o‘limiga aybdorlarga adolatli hukm chiqarishni so‘radi. Bu haqda u Toshkent viloyati sudining appelyatsiya instansiyasi tomonidan o‘tkazilayotgan navbatdagi sud majlisida gapirdi.
Yulduzxon Sultonova o‘g‘lining o‘limiga aynan kimlar aybdor ekanini bilmasligini, biroq Jinoyat ishlari bo‘yicha Angren shahar sudida aybdorlarga uzog‘i bilan 4 yil muddatga ozodlikdan mahrum qilish jazosini tayinlab, o‘g‘lining qotillariga kam jazo berilganini aytdi. Ayni paytdagi sud majlisida appelyatsiya instansiyasi tomonidan aybdorlarga yetarlicha jazo tayinlanishidan umidvorligini maʼlum qildi.
Shunday adolatli hukm o‘qingki, toki onaizorlar menga o‘xshab bolam deb kuyib yurmasin. Men qahraton qishning sovuq kunlarida to‘rt oylab Jinoyat ishlari bo‘yicha Angren shahar sudiga qatnab, o‘g‘limning qotillariga atigi 4 yil ozodlikdan mahrum qilish jazosi tayinlanishiga erishdim. Men bundan noroziman. O‘g‘limni aynan kim o‘ldirganini bilmayman, bular o‘ldirganini ham o‘z ko‘zim bilan ko‘rmaganman. Ammo haqiqiy aybdorlar topilib, ularga qattiqroq jazo tayinlanishini so‘rayman. Og‘irroq jazo sabab bundan keyin hech qaysi ona bolam deb yig‘lamasin. Boshqa onalar men kabi sarson bo‘lmasin, — deydi IIB xodimlari urib o‘ldirgan 32 yoshli yigitning onasi.
Marhumning onasi sudda uni sudlanuvchilardan pul so‘rashda ayblaganlarga ham javob qaytardi.
“Daryo” muxbiriga gapirganlar men ulardan 40 million so‘m pul olganimni ham gapirishibdi. To‘g‘ri, buni inkor etmayman. Tergovchi bilan suhbatlashgan paytim menga 40 million so‘m pul berishmoqchi deganimda “o‘g‘lingiz vafot etgan paytda janoza marosimlarini o‘tkazish uchun yordam berilganmidi”, deb so‘ragandi. Yo‘q, degan javobimdan so‘ng “unda bu pullarni oling. Bu pullar sizning xarajatlaringiz uchun ekan”, degandi. Shu sabab sudlanuvchilar tomonidan berilgan 40 million so‘mni olganim rost. Ammo yana pul so‘rayapti, degan gap yolg‘on, — deydi Yulduzxon Sultonova.
Marhumning onasi “Daryo” muxbiri bilan avvalgi suhbatida “O‘g‘lim o‘talmay qolgan muddatini o‘tash uchun 19-mart kuni (2022 yil — tahririyat izohi) tergov hibsxonasiga olib borilgandi. Men tergov hibsxonasidagi kuzatuv kameralaridan birini ko‘rdim. 20-mart kuni esa kechki payt 22:45 da o‘g‘limni bir xonaga olib kirishib, ichida kim borligini bilmadim, salkam 4 soatda ko‘tarib olib chiqishdi. Olib chiqqanlar orasida 5 ta militsiya xodimi bor ekan. 20-martdan 21-martga o‘tar kechasi o‘g‘limni qayergadir tashlashgan, shu kechasi umuman qarashmagan. Xullas, bolam vahshiylarcha o‘ldirilgan. Sog‘ joyi qolmagan. Aybdorning kimligini bilmayman. Aybdorlar topilib, jazo olishini so‘rayman. Men ham kimgadir tuhmat qilishdan qo‘rqaman”, degandi.
Sud 2023-yilning 19-iyul kuni soat 15:00 ga qadar tanaffus eʼlon qildi.
Izoh (0)