O‘zbekiston davlat xoreografiya akademiyasi faoliyati o‘rganilganida bir qator korrupsiyaviy omillar aniqlandi, deb xabar bermoqda Bosh prokuratura axborot xizmati.
Unga ko‘ra, Bosh prokuratura tomonidan madaniyat va madaniy meros sohasidagi qonunchilik ijrosi ustidan tizimli nazorat tadbirlari o‘tkazib kelinmoqda. Jumladan, O‘zbekiston davlat xoreografiya akademiyasi faoliyati o‘rganilganida, oliygohga o‘qishga qabul qilishda shaffoflik taʼminlanmasdan, korrupsiyaviy omillarga zamin yaratilgani aniqlandi. Xususan:
- meʼyoriy hujjatlar talablariga zid ravishda o‘qishga qabul boshlangani haqida keng jamoatchilikka bir oy oldin xabar berilmagan;
- 496 nafar abituriyentning ijodiy imtihon natijalari videotasvirga olinmagan;
- 52 nafar abituriyentning amaliy ishlari shifrlanmasdan, maxfiyligi taʼminlanmagan holda qabul komissiyasi tomonidan baholangan.
Bundan tashqari, akademiyada 22 nafar o‘qituvchi-pedagogga dars mashg‘ulotlari meʼyor talablariga zid ravishda qo‘shib yozilib, 319 million so‘m, o‘tilmagan dars soatlari uchun 154 million so‘m to‘lab berilgan. Hujjatlar soxtalashtirilib, haqiqatda ishlamagan 7 nafar xodimga 270 million so‘m, yuklatilgan vazifalarni bajarmagan 6 nafar xodimga 107 million so‘m asossiz to‘lanib, budjet mablag‘lari o‘zlashtirilgan.
Moddiy javobgar shaxslar tomonidan 76 million so‘mlik tovar-moddiy boyliklar kamomadiga yo‘l qo‘yilgan. Aniqlangan qonunbuzilish holatlari yuzasidan jinoyat ishi qo‘zg‘atilib, hozirda tergov harakatlari olib borilmoqda.
Izoh (0)