Андижондаги тергов ҳибсхонасида 12 нафар ИИБ ходими томонидан уриб ўлдирилгани айтилган марҳум Санжарбек Мамажоновнинг онаси Юлдузхон Султонова судьялардан ўғлининг ўлимига айбдорларга адолатли ҳукм чиқаришни сўради. Бу ҳақда у Тошкент вилояти судининг аппеляция инстанцияси томонидан ўтказилаётган навбатдаги суд мажлисида гапирди.
Юлдузхон Султонова ўғлининг ўлимига айнан кимлар айбдор эканини билмаслигини, бироқ Жиноят ишлари бўйича Ангрен шаҳар судида айбдорларга узоғи билан 4 йил муддатга озодликдан маҳрум қилиш жазосини тайинлаб, ўғлининг қотилларига кам жазо берилганини айтди. Айни пайтдаги суд мажлисида аппеляция инстанцияси томонидан айбдорларга етарлича жазо тайинланишидан умидворлигини маълум қилди.
Шундай адолатли ҳукм ўқингки, токи онаизорлар менга ўхшаб болам деб куйиб юрмасин. Мен қаҳратон қишнинг совуқ кунларида тўрт ойлаб Жиноят ишлари бўйича Ангрен шаҳар судига қатнаб, ўғлимнинг қотилларига атиги 4 йил озодликдан маҳрум қилиш жазоси тайинланишига эришдим. Мен бундан норозиман. Ўғлимни айнан ким ўлдирганини билмайман, булар ўлдирганини ҳам ўз кўзим билан кўрмаганман. Аммо ҳақиқий айбдорлар топилиб, уларга қаттиқроқ жазо тайинланишини сўрайман. Оғирроқ жазо сабаб бундан кейин ҳеч қайси она болам деб йиғламасин. Бошқа оналар мен каби сарсон бўлмасин, — дейди ИИБ ходимлари уриб ўлдирган 32 ёшли йигитнинг онаси.
Марҳумнинг онаси судда уни судланувчилардан пул сўрашда айблаганларга ҳам жавоб қайтарди.
“Дарё” мухбирига гапирганлар мен улардан 40 миллион сўм пул олганимни ҳам гапиришибди. Тўғри, буни инкор этмайман. Терговчи билан суҳбатлашган пайтим менга 40 миллион сўм пул беришмоқчи деганимда “ўғлингиз вафот этган пайтда жаноза маросимларини ўтказиш учун ёрдам берилганмиди”, деб сўраганди. Йўқ, деган жавобимдан сўнг “унда бу пулларни олинг. Бу пуллар сизнинг харажатларингиз учун экан”, деганди. Шу сабаб судланувчилар томонидан берилган 40 миллион сўмни олганим рост. Аммо яна пул сўраяпти, деган гап ёлғон, — дейди Юлдузхон Султонова.
Марҳумнинг онаси “Дарё” мухбири билан аввалги суҳбатида “Ўғлим ўталмай қолган муддатини ўташ учун 19 март куни (2022 йил — таҳририят изоҳи) тергов ҳибсхонасига олиб борилганди. Мен тергов ҳибсхонасидаги кузатув камераларидан бирини кўрдим. 20 март куни эса кечки пайт 22:45 да ўғлимни бир хонага олиб киришиб, ичида ким борлигини билмадим, салкам 4 соатда кўтариб олиб чиқишди. Олиб чиққанлар орасида 5 та милиция ходими бор экан. 20 мартдан 21 мартга ўтар кечаси ўғлимни қаергадир ташлашган, шу кечаси умуман қарашмаган. Хуллас, болам ваҳшийларча ўлдирилган. Соғ жойи қолмаган. Айбдорнинг кимлигини билмайман. Айбдорлар топилиб, жазо олишини сўрайман. Мен ҳам кимгадир туҳмат қилишдан қўрқаман”, деганди.
Суд 2023 йилнинг 19 июль куни соат 15:00 га қадар танаффус эълон қилди.
Изоҳ (0)