Sirdaryo viloyati hokimligi “Viloyat mahalliy budjetining 2023-yilda shakllangan qo‘shimcha manbalari hisobidan mablag‘ ajratish to‘g‘risida”gi qarori loyihasini Normativ-huquqiy hujjatlar muhokamasi portaliga qo‘ydi. Qaror 11—26-iyul kunlari oralig‘ida jamoatchilik muhokamasida bo‘ladi.
Unda yozilishicha, O‘zbekiston Respublikasi prezidenti qaror va farmoyishlarida, hukumat qarorlari va bayonlarida belgilangan topshiriqlar ijrosini taʼminlash hamda hududlarni ijtimoiy-iqtisodiy rivojlantirish, infratuzilma obyektlarini qurish va aholi turmush farovonligini oshirish maqsadida amalga oshiriladigan xarajatlar uchun viloyat mahalliy budjetining qo‘shimcha manbalari hisobidan quyidagi yo‘nalishlar uchun mablag‘ ajratiladi:
- Viloyat hokimligiga qo‘shimcha bino qurish bilan bog‘liq xarajatlarga — 1 milliard so‘m;
- Xususiy sheriklik asosida isitish tizimiga o‘tayotgan ijtimoiy soha muassasalarining isitish tizimlarini modernizatsiya qilish bo‘yicha loyiha-smeta hujjatlarini ishlab chiqish va ekspertizadan o‘tkazish xarajatlariga — 1 milliard 200 million so‘m;
- 2023-yilda ipoteka kreditlari bo‘yicha dastlabki badalning bir qismini qoplash hamda foiz to‘lovlarining bir qismini qoplash uchun subsidiya mablag‘larini ajratish xarajatlariga — 1 milliard so‘m;
- Sirdaryo viloyati hokimining o‘rinbosarlariga hamda tuman va shahar hokimlariga 16 ta Tracker avtomashinasini xarid qilish bilan bog‘liq xarajatlarga — 4 milliard so‘m;
- xarid qilingan jihozlarni saqlash bo‘yicha ijaradan yuzaga kelgan qarzdorliklarni qoplash xarajatlariga — 400 million so‘m.
Davlat moliyaviy nazorati viloyat boshqarmasi ajratilgan mablag‘larning maqsadli va samarali ishlatilishi yuzasidan yakuniy tekshirish o‘tkazib, tekshirish natijalari Xalq deputatlari viloyat kengashiga kiritib borilishini taʼminlaydi. Viloyat Davlat soliq boshqarmasi tuman va shahar hokimliklari bilan birgalikda 2023-yil uchun Sirdaryo viloyati mahalliy budjeti daromadlari prognozini hududlar kesimida bajarilishini taʼminlaydi.
Izoh (0)