Toshkent viloyati sudining apellyatsiya instansiyasida andijonlik 32 yoshli mahbusni urib o‘ldirishda ayblanib, jazoga tortilgan 12 nafar tergov hibsxona xodimlarining 10 nafari tomonidan kiritilgan apellyatsiya shikoyati ko‘rib chiqilayotgani xabar berilgandi. Mazkur sud jarayonida ishtirok etgan “Daryo” jurnalisti sudda ko‘rinish bergan marhumning onasi va sudlanganlarning yaqinlariga mikrofon tutdi.
Suhbatdoshlardan biri, jumladan marhumning onasi Yulduzxon Sultonova 32 yoshli o‘g‘li dahshatli o‘lim topganini aytayotgan bo‘lsa, sudlanuvchilarning yaqinlari jinoyat ishlari bo‘yicha Angren shahar sudining hukmi adolatsiz bo‘lganini, ichkaridagi IIB xodimlarining aybi yo‘qligini aytmoqda.
Marhum Sanjarbek Mamajonovning onasi bo‘laman. O‘g‘lim o‘talmay qolgan muddatini o‘tash uchun 19-mart kuni (2022-yil — tahririyat izohi) tergov hibsxonasiga olib borilgandi. Men tergov hibsxonasidagi kuzatuv kameralaridan birini ko‘rdim. 20-mart kuni esa kechki payt 22:45 da o‘g‘limni bir xonaga olib kirishib, ichida kim borligini bilmadim, salkam 4 soatda ko‘tarib olib chiqishdi.
Olib chiqqanlar orasida 5 ta “melisa” xodimi bor ekan. 20-martdan 21-martga o‘tar kechasi o‘g‘limni qayergadir tashlashgan, shu kechasi umuman qarashmagan. Xullas, bolam vahshiylarcha o‘ldirilgan. Sog‘ joyi qolmagan. Aybdorning kimligini bilmayman. Aybdorlar topilib, jazo olishini so‘rayman. Men ham kimgadir tuhmat qilishdan qo‘rqaman, — deydi marhumning onasi Yulduzxon Sultonova.
Sudlanuvchilardan birining yaqini Raʼnoxon Abdusaidova marhumni “narkoman” deb atab, u 6 oy Qarshi shahridagi qamoqxonada jazo muddatini o‘tagani, narkologiyada davolanib chiqqanini aytib, “uni balki do‘xtirlar urgandir”, deydi.
Kameraga tushgan “melisa”ni qamab qo‘yish nohaqlik-da. Boshqa odam o‘ldiryapti, lekin 15 nafar “melisa”ni qamab qo‘yishmoqda. O‘lgan bolani ham surishtiring, oldin oddiy “narkoman” bola bo‘lgan ekan. Marhumning onasi pul talab qilmoqda. Pul berilsa-da, norozi bo‘lib ustidan yozmoqda, — deydi Raʼnoxon Abdusaidova.
Shaxsini ochiqlashni istamagan sudlanuvchilarning yaqinlaridan biri ichki ishlar xodimlari fuqaroni o‘ldiraman degan niyatda urmasligini aytmoqda.
“Melisa”lar hech qachon urmaydi. Meni qo‘limda o‘ladi deb, hech qachon urmaydi. Narkotik isteʼmol qilsa, o‘zi “psix” bo‘lsa, qanday qilib uni urishi mumkin? O‘lgan odam kim bo‘lgan, davlatga nima qilib bergan degan maʼlumotlarni topib, keyin chiqaring, — deydi sudlanuvchilardan birining xotini ekanini aytayotgan ayol.
15 yil ichki ishlar tizimida faoliyat yuritgan, ayni paytda sudlanuvchi sifatida sudning qora kursisida o‘tirganlardan birining onasiga ko‘ra, uning o‘g‘li hatto marhumni tanimagan.
Bu ichkarida bo‘lgan ish ekan. Bir bola sudda men urdim, men o‘ldirdim dedi. Lekin sudda buni inobatga olishmadi, — deydi sudlanuvchining onasi.
Eslatib o‘tamiz, Andijon viloyatining Shahrixon tumanida yashagan 32 yoshli S.M. 2022-yil 21-mart kuni IIB xodimlari va bir nafar mahkum tomonidan qiynoqqa solinishi oqibatida tergov hibsxonasida vafot etgandi. Sud marhumning o‘limiga sababchi deb topgan IIV JIEDga qarashli 3-son tergov hibsxonasida ishlovchi 6 nafar xodimning har birini 1 yil 6 oy muddatga ichki ishlar organlari tizimida ishlash huquqidan mahrum qilgan holda 4 yil muddatga ozodlikdan mahrum qilgandi. Shuningdek, qolgan 6 nafar xodim esa 1 yil 6 oy muddatga ichki ishlar organlari tizimi va shifokorlik lavozimlarida ishlash huquqidan mahrum etilib, 3 yilga ozodlikni cheklash jazosi bilan jazolangandi. Bundan tashqari, marhum mahbusni kamerada kaltaklagan mahkum J.U.ga 4 yil 1 oy muddatga ozodlikdan mahrum qilish jazosi tayinlangan.
Izoh (0)