O‘zbekistonda muddatidan ilgari prezident saylovi 2023-yil 9-iyul kuni bo‘lib o‘tdi. Mamlakat bo‘ylab ochilgan 10 mingdan ortiq saylov uchastkalarida jami ro‘yxatga olingan saylovchining 15,6 million nafari, ya’ni saylovchilarning 79,8 foizi ovoz bergan.
Saylov byulletenlari va komissiyalarining moliyaviy hisobotlari keyinchalik qayerda va qay tartibda saqlanishi ko‘pchilikka qiziq. Markaziy saylov komissiyasi axborot xizmati rahbari Murodilla Alimboyevning “Daryo”ga maʼlum qilishicha, saylov byulletenlarini arxivga joylashtirish va ularni keyinchalik yo‘q qilish bo‘yicha Markaziy saylov komissiyasining qarori bilan yo‘riqnoma ishlab chiqilgan.
“Mazkur Yo‘riqnomaning 9-bandiga ko‘ra, saylov byulletenlari, shuningdek, referendumda ovoz berish byulletenlari saylov yoki referendum yakunlari rasman eʼlon qilinganidan so‘ng tegishliligi bo‘yicha shahar va tuman hokimliklariga topshiriladi. Byulletenlar hokimliklarning idoraviy arxivlarida bir yil davomida saqlanadi va Yo‘riqnomada belgilangan tartibda yo‘q qilinadi”, — dedi Murodilla Alimboyev.
“O‘zarxiv” agentligi matbuot xizmati rahbari Anvar Aliyevning qo‘shimcha qilishicha, okrug va uchastka komissiyalarining moliyaviy hisobotlari ham shahar va tuman hokimliklariga topshiriladi.
“Ularning idoraviy arxivlarida besh yil davomida saqlanadi va Yo‘riqnomada belgilangan tartibda yo‘q qilinadi”, — dedi Anvar Aliyev.
Muddatidan ilgari O‘zbekiston prezidenti saylovi
30-aprelda bo‘lib o‘tgan referendum natijalariga ko‘ra, O‘zbekiston Konstitutsiyasi yangi tahrirda qabul qilindi. Yangilangan Konstitutsiya davlat hokimiyati oldiga yangi siyosiy, ijtimoiy-iqtisodiy vazifalarni qo‘ydi. Shu bois davlat rahbari Konstitutsiyaning 128-moddasiga muvofiq, muddatidan ilgari prezident saylovi o‘tkazish haqida xalqqa murojaat qildi. Bu tashabbus Oliy Majlis palatalari, siyosiy partiyalar hamda jamoatchilik faollari tomonidan qo‘llab-quvvatlandi.
6-may kuni Saylov kodeksiga kiritilgan o‘zgartirishlarga ko‘ra prezident muddatidan ilgari O‘zbekiston prezidenti saylovini tayinlagan taqdirda, saylov ushbu kodeksga to‘liq muvofiq holda 2 oy ichida o‘tkaziladi. Bunda saylovga tayyorgarlik ko‘rish hamda uni o‘tkazishga doir tadbirlarni amalga oshirish muddatlari Markaziy saylov komissiyasi tomonidan belgilanadi. Prezidentlikka nomzodlarning saylovoldi tashviqoti 7-iyundan boshlandi. O‘zbekiston prezidenti saylovida ishtirok etayotgan har bir nomzodga targ‘ibot tadbirlari uchun 4 milliard 914 million so‘m ajratilgan.
Izoh (0)