“Ushlab olib, sochlarini kesib tashladim”. Qashqadaryoda er xotiniga zulm o‘tkazib kelgani aytilmoqda

Qashqadaryo viloyatining Shahrisabz shahrida yashovchi 26 yoshli ayol S.YU. bir yil davomida eridan kaltak yeb kelgani uchun, uning zulmidan qochib, Rossiyada ishlovchi onasi va akasining oldiga ketishga uringan. Shu sabab eri tomonidan takroran kaltaklanib, sochlari kesib tashlangan. Bu haqda “Daryo”ga murojaatchilar bilan suhbatlashgan manba xabar berdi.

Aytilishicha, voqea Shahrisabz shahrining “Qushxona” mahallasida sodir bo‘lgan.

Bu ayolning eri bir yildan beri xotinini kaltaklab, uyidan chiqishiga ruxsat bermay yurgan. Buni qizning onasi va akasi bilgach, uzoqdaligi uchun kelolmasa-da, ayolga eridan qochib, ularning yoniga borishini aytgan. Qiz Rossiyada ishlovchi akasi va onasining oldiga borish uchun qochib chiqqanda, yana eri ushlab olib shu ahvolga solgan, — deydi suhbatdosh.

Manbaning qo‘shimcha qilishicha, ayoliga zulm o‘tkazib kelgan erkak bu videoni qizning onasiga yuborgan va “qizing hech qayoqqa ketolmaydi”, degan.

“Daryo” voqealar rivojini kuzatishda davom etadi.