Ўзбекистонда муддатидан илгари президент сайлови 2023 йил 9 июль куни бўлиб ўтди. Мамлакат бўйлаб очилган 10 мингдан ортиқ сайлов участкаларида жами рўйхатга олинган сайловчининг 15,6 миллион нафари, яъни сайловчиларнинг 79,8 фоизи овоз берган.
Сайлов бюллетенлари ва комиссияларининг молиявий ҳисоботлари кейинчалик қаерда ва қай тартибда сақланиши кўпчиликка қизиқ. Марказий сайлов комиссияси ахборот хизмати раҳбари Муродилла Алимбоевнинг “Дарё”га маълум қилишича, сайлов бюллетенларини архивга жойлаштириш ва уларни кейинчалик йўқ қилиш бўйича Марказий сайлов комиссиясининг қарори билан йўриқнома ишлаб чиқилган.
“Мазкур Йўриқноманинг 9-бандига кўра, сайлов бюллетенлари, шунингдек, референдумда овоз бериш бюллетенлари сайлов ёки референдум якунлари расман эълон қилинганидан сўнг тегишлилиги бўйича шаҳар ва туман ҳокимликларига топширилади. Бюллетенлар ҳокимликларнинг идоравий архивларида бир йил давомида сақланади ва Йўриқномада белгиланган тартибда йўқ қилинади”, — деди Муродилла Алимбоев.
“Ўзархив” агентлиги матбуот хизмати раҳбари Анвар Алиевнинг қўшимча қилишича, округ ва участка комиссияларининг молиявий ҳисоботлари ҳам шаҳар ва туман ҳокимликларига топширилади.
“Уларнинг идоравий архивларида беш йил давомида сақланади ва Йўриқномада белгиланган тартибда йўқ қилинади”, — деди Анвар Алиев.
Муддатидан илгари Ўзбекистон президенти сайлови
30 апрелда бўлиб ўтган референдум натижаларига кўра, Ўзбекистон Конституцияси янги таҳрирда қабул қилинди. Янгиланган Конституция давлат ҳокимияти олдига янги сиёсий, ижтимоий-иқтисодий вазифаларни қўйди. Шу боис давлат раҳбари Конституциянинг 128-моддасига мувофиқ, муддатидан илгари президент сайлови ўтказиш ҳақида халққа мурожаат қилди. Бу ташаббус Олий Мажлис палаталари, сиёсий партиялар ҳамда жамоатчилик фаоллари томонидан қўллаб-қувватланди.
6 май куни Сайлов кодексига киритилган ўзгартиришларга кўра президент муддатидан илгари Ўзбекистон президенти сайловини тайинлаган тақдирда, сайлов ушбу кодексга тўлиқ мувофиқ ҳолда 2 ой ичида ўтказилади. Бунда сайловга тайёргарлик кўриш ҳамда уни ўтказишга доир тадбирларни амалга ошириш муддатлари Марказий сайлов комиссияси томонидан белгиланади. Президентликка номзодларнинг сайловолди ташвиқоти 7 июндан бошланди. Ўзбекистон президенти сайловида иштирок этаётган ҳар бир номзодга тарғибот тадбирлари учун 4 миллиард 914 миллион сўм ажратилган.
Изоҳ (0)