Surxondaryoda fermerni rezina etik bilan urgan, uni “cho‘chqa” deb haqorat qilgan prokurorga chora ko‘rildi. Bu haqda Bosh prokuratura axborot xizmatiga tayangan “Mushtum” jurnali jamoasi maʼlumot berdi.
Surxondaryo viloyati prokuraturasi tomonidan Bandixon tuman prokurori S.Mahmanovning xatti-harakatlari yuzasidan tekshirish o‘tkazildi. Tekshirish natijasiga ko‘ra, Bandixon tumani prokuroriga nisbatan intizomiy jazo qo‘llanildi, — deyiladi rasmiylar axborotida.
O‘zini Chori Pirimqulov deb tanishtirgan surxondaryolik fermer 2023-yilning 7-iyul kuni prokuror bilan qarama-qarshilik sodir bo‘lganini aytgandi.
Men tuman prokurori Saotmurod Mahmanovdan noroziman, bu kishining olib borayotgan siyosati, xalqqa hurmatsizligi ortiqcha bo‘lyapti, — deydi fermer tuman prokuroridan noroziligini aytar ekan.
Fermer xo‘jaligi rahbari tuman prokurori ikkinchi sektor hududidagi fermerlarga 2 juft etik va bir dona fonar olib kelishi kerakligini tayinlaganini bildirib, “Tuman prokurori aytgan yig‘ilish ‘Shoh barakat’ fermer xo‘jaligiga qarashli dala shiyponida bo‘lishi kerak edi. Shu sabab shiyponga sakkizdan o‘n daqiqa o‘tganda bordim. Yig‘ilish sakkizda boshlanishi aytilgandi. Lekin men etik topishga qiynalganim bois kechikdim. Shunda prokuror nega kechikding, deb so‘raganida saratonda rezina etik topish qiyin bo‘lganini aytib, uzr so‘radim. Etikni olib kel, dedi. Olib borsam, meni ‘cho‘chqa, cho‘chqadan tarqagan’ deya haqoratlab, ‘bu kiyilgan, eski etik ekan’, deb o‘sha etik bilan boshimga urdi. Yelkamga bir necha marotaba qo‘li bilan ham urdi. Shuningdek, ‘itdan tarqagan, chiqqan joyingga tiqib yuboraman’, deya haqoratladi”, — degandi.
Shuningdek, fermer tuman prokurorining kaltagi va haqorati sabab shaʼni toptalganini, barcha tanishlarining kulgisiga qolayotganini afsus bilan aytib bergandi.
Prokurorning bu qilmishiga javoban unga yetarli darajada javob berishim mumkin edi, ammo prokuror formasi sabab bunga botinolmadim. Formaga xiyonat qilishni o‘zimga ep ko‘rmadim, — degandi voqea haqida jamoatchilikka bildirgan fermer.
Bandixon prokurori qaysi qilmishi bilan jamoatchilik e’tiborini tortdi?
Bandixon tumani prokurori Soatmurod Mahmanov tumandagi mahalla raislarini haqorat qilib, jamoatchilikka tanilgandi.
Mazkur audioda prokuror tumandagi MFY raislariga “Erkakmisan sen ham? Xotinchalish, itdan tarqagan ekansan-da, bo‘lmasa odamning ishini qilarding-da. Bor, borib itga o‘xshab vovulla ko‘chada”, deganini, “O‘lsang, bugun ko‘mar edik”, “Itdan tarqaganmisan, odamdan tarqaganmisan?” deya haqorat qilganini eshitish mumkin.
Bosh prokuratura axborot xizmati rahbari Hayot Shamsutdinov prokurorning harakati o‘rganilayotganini, tez orada o‘rganish natijalari haqida maʼlum qilishini bildirgandi. Biroq o‘rganish natijalari nima bilan yakunlangani haligacha jamoatchilikka nomaʼlumligicha qolmoqda.
Izoh (0)