Sirdaryo viloyati Yangiyer shahrida 21 yoshli yigit cho‘kib ketayotgan ona va bolani qutqarib qolgandi. Sirdaryo viloyati hokimi va viloyat Favqulodda vaziyatlar boshqarmasi boshlig‘i uni esdalik sovg‘alari bilan taqdirladi.
Voqea 6-iyul kuni sodir bo‘lgandi. Saidislombek Abdulqosimzoda shaharning qoq markazidan oqib o‘tuvchi Janubiy Mirzacho‘l kanalida ona va bola cho‘kayotganini ko‘rib qolib, ularni qutqarmoqchi bo‘lgan va buning uddasidan chiqqan. Yigitning o‘zi ham cho‘kib ketishiga oz qolganini aytgan.
FVV matbuot xizmatining ma’lum qilishicha, Sirdaryo viloyati hokimi va viloyat Favqulodda vaziyatlar boshqarmasi boshlig‘i G‘ulom Muhamedov ona va bolaning holidan xabar olib, Saidislombek va uning otasi bilan uchrashdi. Uchrashuv davomida Saidislombekka viloyat Favqulodda vaziyatlar boshqarmasi boshlig‘ining faxriy yorlig‘i topshirilib, esdalik sovg‘alari bilan taqdirlandi. Shahar hokimligi ham yigitning kelajakdagi ishlariga zafarlar tilab, esdalik sovg‘alari bilan mukofotlagandi.
Bundan tashqari, Saidislombek viloyat hokimi tomonidan Favqulodda vaziyatlar vazirligi tizimida ishlashga tavsiya qilindi.
Izoh (0)