“O‘zimiz yoqlagan nomzodga ovoz berdik” — muftiy Nuriddin Xoliqnazarov hazratlari prezidentlik saylovida qatnashdi

O‘zbekiston musulmonlari idorasi raisi, muftiy Nuriddin Xoliqnazarov hazratlari ham ovoz berish jarayonida qatnashdi. Bu haqda “Daryo” muxbiri xabar bermoqda.

Bugun, 9-iyul — O‘zbekistonda prezidentlik saylovi kuni. Ertalab soat 08:00 da aholi prezidentlikka nomzodlarga ovoz berishni boshladi. Muftiy hazratlari ham o‘zi yoqlagan nomzodga ovoz berdi. 

“Allohga shukr, bugun shunday tarixiy bir voqeada ishtirok etishni nasib etdi. Ixtiyorimizdagi saylov uchastkasiga kelib, o‘zimizning fuqarolik burchimiz o‘laroq ovoz berib chiqdik. O‘zimiz yoqlagan, o‘zimiz odil deb bilgan nomzodga ovoz berdik. Har bir mo‘min-musulmon banda befarq bo‘lmasligi, va masʼuliyat bilan yashamog‘i lozim. Allohdan umid qilamizki, bugun biz tanlagan nomzod yurtimiz obodligi, vatanimiz taraqqiyoti va yoshlarimiz baxt-u saodati uchun xizmat qiladi”, — dedi O‘zbekiston musulmonlari idorasi raisi.

Avvalroq O‘zbekistonda prezidentlik saylovi boshlangani xabar qilingandi.

Maʼlumot uchun, to‘rt nafar nomzod prezidentlik uchun kurashmoqda. Ular — Xalq demokratik partiyasidan Ulug‘bek Inoyatov, O‘zLiDePdan Shavkat Mirziyoyev, “Adolat” partiyasidan Robaxon Mahmudova hamda Ekopartiyadan Abdushukur Hamzayev.

Saylovda g‘olib bo‘lgan nomzod prezidentlikka 7 yilga saylanadi. Bu haqda yangilangan Konstitutsiyada belgilab qo‘yilgan.

Markaziy saylov komissiyasi axborotiga ko‘ra, 2023-yil 1-iyul holatiga jami 376 ming 623 nafar saylovchilar muddatidan oldin ovoz berish huquqidan foydalangan. Shundan respublika hududida — 275 ming 592 nafar, xorijda — 101 ming 31 nafar saylovchi ovoz bergan.