O‘zbekistonda o‘tgan olti oyda yer uchastkasini o‘zboshimchalik bilan egallash bilan bog‘liq 5 968 ta (2 236,3 gektar) holat aniqlandi. Bu haqda Kadastr agentligi axborot xizmati rahbari Neʼmatjon Atamuratov ma’lum qildi.
Aniqlangan holatlar:
- qishloq xo‘jaligi yerlarida – 1 961 gektar;
- aholi punktlari yerlarida – 144 gektar;
- sanoat, transport, aloqa mudofaa va boshqa maqsadlarga mo‘ljallangan yerlarda – 14,2 gektar;
- tabiatni muhofaza qilishga mo‘ljallangan yerlarda – 1,3 gektar;
- tarixiy madaniy ahamiyatga molik yerlarda – 3,7 gektar;
- o‘rmon fondi yerlarida – 23,2 gektar;
- suv fondi yerlarida 9,9 gektar va zaxira yerlarda 79 gektarni tashkil etadi.
Agentlik organlari tomonidan berilgan yozma ko‘rsatmalar asosida 2 390 ta holatda 642,6 gektar maydondagi qonunbuzilishlarning ixtiyoriy bartaraf etilishi taʼminlangan. O‘zboshimchalik bilan egallangan yer maydonlarida qurilgan noqonuniy qurilmalarni bartaraf etish yuzasidan sudlarga 1 754 ta da’vo arizalari kiritilgan. Yer bilan bog‘liq 325 ta holatda esa to‘plangan hujjatlar prokuratura organlariga yuborilgan.
Ta’kidlash kerakki, 2021- va 2022-yilning besh oyi davomida respublika bo‘yicha yer uchastkasini o‘zboshimchalik bilan egallash bilan bog‘liq 24 511 ta (5 164,7 gektar) holat aniqlangandi.
Bundan oldin O‘zbekistonda 2,4 million xonadonning kadastr hujjati yo‘qligi ma’lum qilingan edi. Kadastr agentligi munosabatida keltirilishicha, kadastr hujjatlari yo‘qligi deganda mulk va egalik huquqini belgilovchi hujjatlar mavjud bo‘lmagan ko‘chmas mulklar nazarda tutilgan. Yer ajratish hujjati bo‘lmagani sababli kadastr organlari huquqni davlat ro‘yxatidan o‘tkazolmaydi.
Izoh (0)