Ўзбекистонда ўтган олти ойда ер участкасини ўзбошимчалик билан эгаллаш билан боғлиқ 5 968 та (2 236,3 гектар) ҳолат аниқланди. Бу ҳақда Кадастр агентлиги ахборот хизмати раҳбари Неъматжон Атамуратов маълум қилди.
Аниқланган ҳолатлар:
- қишлоқ хўжалиги ерларида – 1 961 гектар;
- аҳоли пунктлари ерларида – 144 гектар;
- саноат, транспорт, алоқа мудофаа ва бошқа мақсадларга мўлжалланган ерларда – 14,2 гектар;
- табиатни муҳофаза қилишга мўлжалланган ерларда – 1,3 гектар;
- тарихий маданий аҳамиятга молик ерларда – 3,7 гектар;
- ўрмон фонди ерларида – 23,2 гектар;
- сув фонди ерларида 9,9 гектар ва захира ерларда 79 гектарни ташкил этади.
Агентлик органлари томонидан берилган ёзма кўрсатмалар асосида 2 390 та ҳолатда 642,6 гектар майдондаги қонунбузилишларнинг ихтиёрий бартараф этилиши таъминланган. Ўзбошимчалик билан эгалланган ер майдонларида қурилган ноқонуний қурилмаларни бартараф этиш юзасидан судларга 1 754 та даъво аризалари киритилган. Ер билан боғлиқ 325 та ҳолатда эса тўпланган ҳужжатлар прокуратура органларига юборилган.
Таъкидлаш керакки, 2021- ва 2022 йилнинг беш ойи давомида республика бўйича ер участкасини ўзбошимчалик билан эгаллаш билан боғлиқ 24 511 та (5 164,7 гектар) ҳолат аниқланганди.
Бундан олдин Ўзбекистонда 2,4 миллион хонадоннинг кадастр ҳужжати йўқлиги маълум қилинган эди. Кадастр агентлиги муносабатида келтирилишича, кадастр ҳужжатлари йўқлиги деганда мулк ва эгалик ҳуқуқини белгиловчи ҳужжатлар мавжуд бўлмаган кўчмас мулклар назарда тутилган. Ер ажратиш ҳужжати бўлмагани сабабли кадастр органлари ҳуқуқни давлат рўйхатидан ўтказолмайди.
Изоҳ (0)