Buxoro viloyati G‘ijduvon tumanidagi bank filiali kassiri mijozlarning 41 ta bank kartalaridagi mablag‘larni o‘g‘irlagani aniqlandi, deb xabar bermoqda IIV matbuot xizmati.
Ma’lum qilinishicha, Buxoro viloyati G‘ijduvon tumanida yashovchi fuqaro plastik kartasidan pullar o‘g‘irlangani haqida IIBga murojaat qilgan. O‘tkazilgan tezkor-tadbirda pullarni o‘g‘irlagan shaxs G‘ijduvon tumanidagi bank filiali sayyor kassasining 2002-yilda tug‘ilgan kassiri ekani aniqlangan.
Tergov harakatlari davomida aniqlanishicha, u 2022-yil noyabridan 2023-yil 29-may kunigacha fuqarolarning pensiya to‘lovlari, moddiy yordam va ikki yoshgacha nafaqa pullarini olish uchun ochilgan 41 ta plastik kartalaridan jami 21,9 million so‘m pullarni o‘zlashtirib, o‘zining ehtiyojlari uchun ishlatib yuborgan.
Unga nisbatan Jinoyat kodeksining 169-moddasi (o‘g‘rilik) 1-qismi bilan jinoyat ishi qo‘zg‘atildi. Hozirda o‘g‘irlangan mablag‘larning barchasi qoplanib, holat yuzasidan tergov harakatlari olib borilmoqda.
Izoh (0)