Yangi Toshkent hududida 35 gektar sun’iy ko‘l tashkil qilinadi

O‘zbekiston liberal-demokratik partiyasidan O‘zbekiston Respublikasi Prezidentligiga nomzod Shavkat Mirziyoyev toshkentlik saylovchilar bilan uchrashuv chog‘ida kelgusi yetti yilda poytaxtni “yashillashtirishga” oid rejalar haqida to‘xtaldi.

“Bugungi kunda poytaxtimizda yashil maydonlar 900 gektarni tashkil qiladi. Kelgusi yetti yilda bu hududni 5 barobar ko‘paytirib, 5 ming gektarga yetkazamiz”, — dedi nomzod.

Shavkat Mirziyoyev buning uchun shahar bo‘ylab har yili kamida 1 mln dona manzarali, mevali ko‘chatlar va qalamchalar ekilishini aytdi.

Shuningdek:

• har bir mahallada 1 mingtadan daraxt ko‘chatlari ekish ishlari davom ettiriladi;
• Yashnobod, Yangihayot, Sergeli va Mirzo Ulug‘bek tumanlarida 4 ming gektar maydonda yashil va “tematik” bog‘lar barpo qilinadi.

Bundan tashqari, shahar bo‘ylab 100 kilometr velosiped yo‘laklari, 32 ta sayilgoh, 30 ta yashil hudud va xiyobonlar barpo qilinadi.

Nomzodning ta’kidlashicha, Yangi Toshkent hududida umumiy maydoni 35 gektar bo‘lgan sun’iy ko‘l tashkil qilinib, odamlarimizning madaniy hordiq chiqarishi uchun barcha sharoitlar yaratiladi.