Tashqi mehnat migratsiyasi agentligi fuqarolarni xorijda ishga joylashtirish vakolatiga ega bo‘lmagan tashkilotlar bilan shartnoma tuzmaslikka chaqirdi.
Xorijda ishlash istagidagi fuqarolar uchun qo‘shimcha imkoniyatlar yaratish maqsadida O‘zbekistonda 2018-yildan xususiy bandlik agentliklari (XBA) faoliyatiga ruxsat berilgan. Agentlikka ko‘ra, o‘tgan davr mobaynida ayrim XBA tomonidan fuqarolarni aldash va ishonchini suisteʼmol qilish holatlari sodir etilgan. Bu kabi salbiy holatlarning oldini olish maqsadida “Xususiy bandlik agentliklari to‘g‘risida”gi qonunga o‘zgartish va qo‘shimchalar kiritilib, 2020-yilning 14-noyabridan ular faoliyatida jiddiy o‘zgarishlar joriy etilgan.
Amaldagi tartibga ko‘ra:
- fuqarolarni xorijda ishga joylashtirish bo‘yicha litsenziyaga ega XBA axborot va maslahat xizmatlari uchun BHMning bir baravaridan, yaʼni 330 ming so‘mdan ko‘p pul olishi mumkin emas;
- chet ellik ish beruvchi va hamkori bilan shartnomalar tuzmasdan, fuqarolarga xizmat ko‘rsatish taqiqlanadi hamda ushbu shartnomalar XBAning rasmiy veb-saytida joylashtirilishi lozim.
O‘tgan davr mobaynida XBA reyestridan 118 ta yuridik shaxs ro‘yxatdan o‘tgan bo‘lib, hozirgi kunda ulardan 9 tasi fuqarolarni xorijda ishga joylashtirish huquqini beruvchi litsenziyaga ega.
“Shu munosabat bilan, xorijda ishga joylashtirish vakolatiga ega bo‘lmagan tashkilotlar yoki shaxslarga ishonmaslikka, turli ko‘rinishdagi shartnomalarni tuzmaslikka va to‘lovlarni amalga oshirmaslikka chaqiramiz. Xorijda ish taklif qilayotgan tashkilotlarning litsenziyasi borligiga ishonch hosil qiling. Shartnoma tuzayotganda, uning shartlarini o‘qib, to‘liq tushunib imzo qo‘ying”, — deyiladi xabarda.
Agentlik fuqarolarga XBA bilan nizoli vaziyatlarga duch kelsa, Kambag'allikni qisqartirish va bandlik vazirligiga murojaat qilishi mumkinligini eslatadi.
Iyun oxirlarida bir guruh O‘zbekiston fuqarolari ishlash maqsadida Germaniyaga borib, qiyin ahvolda qolgani haqida xabarlar tarqalgandi. Unda 300 ga yaqin yoshlar ishlash uchun borib sarson bo‘lib yurgani, qayerga borishini bilmay bir necha kundan beri vokzalda tunayotgani aytilgan.
Kambag‘allikni qisqartirish va bandlik vazirligi tomonidan e’lon qilingan dastlabki o‘rganishlar natijasida maʼlum bo‘lishicha, Turon World Cooperation xususiy bandlik agentligi MCHJ vakillari o‘zlariga tanish bir qator tashkilotlar bilan hamkorlikda 2023-yilning may—iyun oylarida Work and travel dasturi orqali Germaniyaga 102 nafar talabani jo‘natgan. Ammo Germaniyaga yetib borgan talabalarni ish bilan taʼminlashda muammolar yuzaga kelgan.
Izoh (0)