“O‘zgidromet” 2023-yil yoz oyining boshi hatto O‘rta Osiyo iqlimi uchun ham juda issiq bo‘lganini ma’lum qildi.
Issiq oyning boshidan boshlandi va deyarli ikkinchi o‘n kunlik oxirigacha davom etdi. Bu davrda O‘zbekiston hududi bo‘yicha o‘rtacha havo harorati o‘rtacha ko‘p yillik qiymatlardan 3-5 darajaga yuqori bo‘ldi. Birinchi va ikkinchi o‘n kunliklarning eng issiq kunlarida havo 39-42 darajagacha, respublikaning eng chekka janubida 43-45 darajagacha isidi.
Qayd etilishicha, iyun oyida bunday harorat qiymatlari kamdan kam uchraydigan holat deb hisoblanmaydi. Meteorologik kuzatuvlarning barcha yillari uchun iyun oyining mutlaq maksimal harorati 42-44 darajani, cho‘l hududlarda va janubda 45-48 darajani tashkil etadi. Ammo O‘zbekistonda me’yorga nisbatan yuqori bo‘lgan harorat bilan kuzatilgan yoz oyining boshi kamdan kam hollarda kuzatiladi.
Iyun oyining uchinchi o‘n kunligida O‘zbekiston hududiga Kavkazdan salqin havoning kirib kelishi harorat fonini pasaytirdi. Umuman olganda, iyun me’yordan 2-3 daraja yuqori, shimolda esa me’yor atrofida bo‘ldi.
Shuningdek, ma’lum qilinishicha, 2023-yilning iyun oyida Toshkentda eng yuqori harorat 40,5 darajani tashkil etdi, maksimal harorat ikki marotaba 40 darajadan oshdi. Toshkentda barcha kuzatuv yillari uchun iyun oyidagi eng yuqori harorat (mutlaq maksimal harorat) 43,0 darajani tashkil etdi. Bu yilgacha eng issiq iyun oylari qatorida birinchi o‘rinni 2021-yil iyun oyi egallab kelgan, ushbu yilda Toshkentda maksimal harorat 42,6 darajaga ko‘tarilgan.
“Uzoq muddatli issiq ob-havo hisobiga, Toshkentda 2023-yil iyun oyi kuzatuvlar tarixidagi eng issig‘i bo‘ldi, u 2021-yil iyun oyidan o‘tib ketdi. 2023-yil iyun oyidagi o‘rtacha harorat 2021-yil iyun oyiga nisbatan 0,4 darajaga yuqori bo‘ldi”, — deyiladi “O‘zgidromet” xabarida.
O‘zbekiston hududining katta qismida 2023-yil iyun oyi eng issiq iyun oylari reytingida birinchi o‘rinni egalladi. 2023-yil iyun oyining yana bir xususiyati shundaki, Qoraqalpog‘iston Respublikasi, Xorazm va Navoiy viloyatlarining shimolida nisbatan issiq bo‘lmadi.
2023-yil iyun oyi respublika hududining katta qismida g‘ayrioddiy harorat tartibidan tashqari ekstremal quruqlik bilan ajralib turdi. Oy davomida yog‘ingarchilik miqdori iyun oyi oylik me’yoridan 0-30 foizdan ko‘p bo‘lmadi.
Izoh (0)