2021-yil va 2022-yilning o‘tgan davrida (1-iyun holatiga) respublika bo‘yicha yer uchastkasini o‘zboshimchalik bilan egallash bilan bog‘liq 24 511 ta (5 164,7 gektar) holat aniqlangan. Bu haqda Kadastr agentligi xabar berdi.
Ma’lum qilinishicha, agentlik organlari tomonidan berilgan yozma ko‘rsatmalar asosida 11 228 ta holatda 3 050,5 gektar (46 foiz) maydondagi qonunbuzilishlarni ixtiyoriy bartaraf etilishi ta’minlangan. O‘zboshimchalik bilan egallangan maydonlarni qaytarish haqida sudlarga 11 687 ta da’vo arizalari kiritilgan.
Yerga oid qonun buzilishi holatlarida jinoyat alomatlari kuzatilgan 1 782 ta ish hujjatlari prokuratura organlariga yuborilgan. Olib borilgan nazorat tadbirlarda 44 438 nafar (2022-yilda 14 338 ta) shaxs ma’muriy javobgarlikka tortilgan.
Shuningdek, Kadastr agentligi tomonidan Yerga oid qonun buzilish holatlarini oldini olish maqsadida 4 408 marotaba (2022-yilda 1 069 marotaba) profilaktik tadbirlar o‘tkazilgan.
Yer va kadastr nazoratini avtomatlashtirish, korrupsiya holatlarini oldini olish maqsadida yerga oid huquqbuzarliklarni aniqlashdan bartaraf etilgunga qadar monitoringini yurituvchi “E-yer nazorat” avtomatlashtirilgan axborot tizimi amaliyotga joriy etilgan.
2022-yilning 5 oyida yer uchastkalarini o‘zboshimchalik bilan egallash bilan bog‘liq 4 652 ta holatlar aniqlanib, huquqbuzarlarga berilgan yozma ko‘rsatmalar asosida 3 241 ta holat belgilangan muddatda ixtiyoriy bartaraf etilgani sababli, huquqbuzarlar jami 22 milliard so‘mdan ortiq ma’muriy jarimadan ozod etilgan.
“Hozirda nazoratda bo‘lgan 1 411 ta holatda yer uchastkalarini o‘zboshimchalik bilan egallagan shaxslardan ham belgilangan muddatlarda huquqbuzarlik holatlarini ixtiyoriy bartaraf etilgan taqdirda ma’muriy jarimadan ozod etiladi”, — deyiladi xabarda.
Izoh (0)