Toshkent shahrining Yunusobod tumanidagi Sayilgoh ko‘chasida joylashgan sobiq Milliy xavfsizlik xizmati (ayni paytdagi DXX) binosini buzish ishlari boshlandi. “Daryo” muxbiri 73 yillik tarixga ega binoning ayni paytdagi holatini suratga oldi.
1950-yilda qurilgani aytilayotgan bino 2,2 gektar maydonga ega bo‘lib, 2021-yil tadbirkorga sotilgan.
Bino va inshootlar maydoni 40 ming 243 kvadrat/metrni, bino maydoni esa 9 ming 376 kvadrat/metrni tashkil qilgan. Kommunikatsiya tarmoqlari (suv, gaz, elektr, issiqlik) mavjud bo‘lgan.
.jpg)
O‘zbekistonning sobiq tashqi ishlar vaziri Abdulaziz Komilovning o‘g‘li Doniyor Komilov tomonidan sotib olingani aytilayotgan bino uning taʼsischiligidagi Metropol Group MCHJ egaligiga o‘tkazilgan.
Sobiq “Markaziy bino” 210 milliard so‘mga sotilgan.
Inshoot tadbirkor qo‘liga o‘tishidan avval Moddiy madaniy merosning ko‘chmas mulk obyektlari milliy ro‘yxatidan chiqarilgan.
Maʼlum qilinishicha, mazkur bino o‘rnida mehmonxona quriladi. Radisson Hotel Group kompaniyasi Metropol Group tashkiloti bilan premium-klassga kiruvchi 164 ta xonaga ega mehmonxona qurish bo‘yicha shartnoma imzolagan. Mehmonxonani 2026-yilgacha qurib bitkazish rejalashtirilgan.
“Radisson Collection Hotel, Tashkent mehmonxona majmuasi yagona meʼmoriy uslubda loyihalashtirilgan to‘rtta binodan iborat ansambl tarkibiga kiradi. Maydoni 130 ming kvadrat metrga yaqin bo‘lib, mintaqadagi eng yirik majmualardan biriga aylanadigan kompleks jamoat joylari, savdo maydonchalari, kinoteatr, ofislar, koshonalar va ko‘p qavatli yerosti avtoturargohlarini o‘z ichiga oladi”, — deyiladi O‘zbekiston otelyerlar assotsiatsiyasi xabarda.
Majmuaning asosiy va eng baland binosi Radisson Collection Hotel, Tashkent bo‘ladi. 22 qavatli bino 27 ming kvadrat metrdan ortiq maydonni egallaydi. Mehmonxonada, shuningdek, restoran, lobbi-bar, VIP-mehmonxona o‘rin oladi. Bitta qavat basseynga ega SPA uchun ajratiladi.
Izoh (0)