“Kompromatuzb ishi” sud muhokamasiga yuborilgani haqida xabar berilgan edi. Oliy sud matbuot kotibi ushbu Telegram kanal bilan bog‘liq jinoyat ishi yuzasidan ma’lumot berdi.
Unga ko‘ra, ushbu jinoyat ishi jinoyat ishlari bo‘yicha Shayxontohur tuman sudining ish yurituviga kelib tushgan bo‘lib, ayni paytda “E-XSUD” elektron axborot tizimi orqali sudyalar o‘rtasida taqsimlanish jarayonidadir.
Tasdiqlangan ayblov xulosasiga ko‘ra mazkur jinoyat ishi bo‘yicha 19 nafar jabrlanuvchi va 10 nafar fuqaroviy da’vogar mavjud bo‘lib, jinoyat oqibatida ularga jami 5 milliard 138 million so‘m miqdorida moddiy zarar yetkazilgani aniqlangan.
Bosh prokuratura tomonidan tasdiqlangan ayblov xulosasiga ko‘ra, 4 nafar shaxs — “Human.uz” sayti asoschisi va muharriri Xurshid Daliyev, Mehnat munosabatlari va bandlik vazirligi matbuot kotibi Mavjuda Mirzayeva, “O‘zbekneftgaz” AJ matbuot kotibi Siyovush Hoshimov va fuqaro Ahmadullo Ahmadjonov Jinoyat kodeksining 165-moddasi 3-qismi (tovlamachilik) va 243-moddasi (jinoiy faoliyatdan olingan daromadlarni legallashtirish) bilan ayblanmoqda.
Maʼlumot uchun, Jinoyat kodeksining 165-moddasi (tovlamachilik) 3-qismi — 10 yildan 15 yilgacha ozodlikdan mahrum qilish bilan jazolanadi. Jinoyat kodeksining 243-moddasi Jinoiy faoliyatdan olingan daromadlarni legallashtirish — Jinoiy faoliyatdan olingan daromadlarni legallashtirish, yaʼni mulk (pul mablag‘lari yoki boshqa mol-mulk) jinoiy faoliyat natijasida topilgan bo‘lsa, uni o‘tkazish, mulkka aylantirish yoxud almashtirish yo‘li bilan uning kelib chiqishiga qonuniy tus berish, xuddi shuningdek bunday pul mablag‘lari yoki boshqa mol-mulkning asl xususiyatini, manbaini, turgan joyini, tasarruf etish, ko‘chirish usulini, pul mablag‘lariga yoki boshqa mol-mulkka bo‘lgan haqiqiy egalik huquqlarini yoki uning kimga qarashliligini yashirish yoxud sir saqlash, — 5 yildan 10 yilgacha ozodlikdan mahrum qilish bilan jazolanadi.
Izoh (0)