O‘zbekiston bosh vaziri Abdulla Aripov 30-iyun kuni gazlangan va gazlanmagan suvlar hamda ichimliklarni majburiy raqamli markirovkalash muddatini uzaytirish to‘g‘risidagi qarorni imzoladi.
Avvaliga markirovkalashni 2022-yil oktabrdan boshlash rejalashtirilgan edi, keyin u 2023-yil 1-iyulga qadar uzaytirilgandi, endilikda ushbu muddat 2024-yil 1-martga o‘zgardi.
Raqamli markirovkalash — bu mahsulot haqidagi ma’lumotlarni elektron bazada saqlaydigan tovarlarni qadoqlash uchun maxsus Data Matrix kodini qo‘llashdir. Natijada har bir kishi tovar sifatini tekshirish va kuzatish imkoniyatiga ega bo‘ladi. Shu maqsadda iste’molchilarga sifatsiz mahsulotlar haqida xabar berish va kerakli ma’lumotlarni olish imkonini beruvchi “Asl Belgisi” mobil dasturi yaratilgan. “Asl Belgisi” tizimida markirovkalash, shuningdek, uning nazorati bo‘yicha chora-tadbirlar 2023—2024-yillar davomida bosqichma-bosqich amalga oshiriladi. Loyihani ishga tushirishda o‘tgan yilgi pilot loyiha tajribalari inobatga olinadi.
Markirovkalash talabi ham mahalliy ishlab chiqaruvchilar ham importyorlarga tegishli:
- birinchi guruh uchun (gazlangan va gazlanmagan suvlar, ichimliklar, shuningdek, uzumdan tashqari, fermentlanmagan shirin meva va sabzavot sharbatlari) — 2024-yil 1-martdan;
- ikkinchi guruh uchun (metall idishdagi suv va ichimliklar) — 2024-yil 1-avgustdan (o‘zgarmagan).
Tovarlarni raqamli markirovkalash tartibining joriy etilishi haqida 2018-yil dekabrda e’lon qilingandi. 2019-yilda tizim operatori sifatida Alisher Usmonovning UMS xoldingi va “Rostex”ga tegishli CRPT Turon tanlangan. Hozirda taʼsischi Digital Holding (100 foiz) bo‘lib, u Davlat aktivlarini boshqarish agentligi (49 foiz), Digital Invest (46,1 foiz) va Vadim Kimga (4,9 foiz) tegishli.
2021-yil yozda suv va ichimliklar ishlab chiqaruvchilar markirovkalash bo‘yicha pilot loyihani to‘xtatishga chaqirgandi, ularning fikricha, bu iqtisodiy jihatdan foydali emas. Markirovkalash bilan shug‘ullanuvchi CRPT Turon kompaniyasi ularning qo‘rquvini “afsona” deb atagandi.
2022-yil 15-aprelda maishiy texnikalarni majburiy markirovkalash boshlandi. Bitta kod 68 so‘mni tashkil etadi (QQSsiz).
Izoh (0)