Халқ депутатлари Бўка тумани кенгашида депутат блогер бўлолмаслиги ҳақида қарор қабул қилинган. Бу ҳақда собиқ депутат Хуршида Обидова Тошкент вилояти Маъмурий суди мажлисида маълум қилди, дея хабар берди “Дарё” мухбири.
Халқ депутатлари Бўка тумани кенгашининг собиқ депутати Хуршида Обидова Тошкент вилояти Маъмурий судига аппеляция шикоятини киритиб, Бўка тумани прокурори ва Халқ депутатлари туман кенгаши мансабдорларининг хатти-ҳаракатларини ноқонуний деб топишни сўраган.
“Бугунги иш бўйича Нурафшон туманлараро маъмурий судининг 2023 йил 8 майдаги суд мажлисида ҳам гапиргандим, суднинг ўша кунги қароридан норозилигимни билдиргандим. Менинг депутатлик дахлсизлигимни ечиш ҳақидаги масала мени кенг жамоа олдида бадном қилиб, ҳақоратчига, ахлоқсиз аёлга чиқаришга қаратилган масала эди. Бу масаланинг ташаббускори кенгаш раиси ўринбосари сифатида ишлаб келувчи Усмон Жўраевдир. 2020 йил депутат сифатида иш бошлаган бўлсак, ўша йили 18 февраль куни туманга Низомиддин Аббосов ҳокимлик қила бошлади. Ҳоким лавозимига тайинланиши билан кенгаш раиси сифатида ҳам фаолият юритмагани учун ўша йили октябрь ойигача кенгашни Усмон Жўраев бошқарди. Усмон Жўраев кенгашга раислиги даврида мен ҳам депутат сифатида, ҳам шахсий блог яратиб, бўлаётган ишлар ҳақида ёзиб бордим. Ёзганларим орасида танқидий чиқишлар ҳам бўлгани учун Усмон Жўраев кенгаш раиси сифатида ‘Депутат блогер бўлолмайди‘, деган тарихий, аммо қонунга зид қарор қабул қилганди”, — дейди собиқ депутат Хуршида Обидова.
Собиқ депутатнинг судда билдиришича, Усмон Жўраев ўша даврда ўз ваколатидан фойдаланиб, ноқонуний қарорлар қабул қилган. Бунга қарши чиққан депутатни ваколатини тўхтатиб қўйиш билан қўрқитишга уринган.
Хуршида Обидованинг судда қўшимча қилишича, у вақтинга кенгашга раислик қилган Усмон Жўраевнинг ер беришга оид ноқонуний хатти-ҳаракатлари устидан Халқ депутатлари вилоят кенгашига ҳам шикоят қилган.
“Бу ҳолат вилоят томонидан ўрганиб чиқилгач, Усмон Жўраев томонидан бир хил кун, бир хил сон билан чиқарилган қонунга зид қарорлари ҳақида гап кетиб, Усмон Жўраев вилоят регламент комиссиясига чақиртирилди. Унга 5 кун муддат берилиб, қонунга зид қарорларингизни қонунга мувофиқлаштириб қўйинг деган таклифлар бўлди. Бироқ Усмон Жўраев бунга эътибор ҳам бермай, йиғилишдан чиқиб кетди. Шунда комиссия раиси Ғофуржон Муҳаммедов бу ҳолат яхши гап билан ҳал қилинмас экан, шуни қонуний ўрганиб чиқиб, прокуратурага топширамиз деди”, — дейди собиқ депутат.
Собиқ депутатнинг аппеляция шикоятини кўриб чиқаётган суд маълум муддатга танаффус эълон қилди.
Аввалроқ Бўкада депутатларни “каламуш”, “хоин”, “ҳоким солдати” деб атаган бошқа депутат жаримага тортилгани маълум қилинганди. Кейинчалик жавобгарликка тортилгани айтилган собиқ депутат “Каламушлар деганда депутатларни назарда тутмадим, ъсолдатъ сўзини ҳам барча депутатга эмас, биргина депутатга қўллаганман”, дея айбловларга жавоб қайтарганди.
Изоҳ (0)