Shavkat Mirziyoyevning 14-iyundagi farmoniga muvofiq, bolalarning dam olishlarini tizimli tashkil etish va sog‘lomlashtirish ishlarini yanada takomillashtirishga doir qo‘shimcha chora-tadbirlar belgilanishi munosabati bilan ayrim hujjatlarga o‘zgartirish va qo‘shimchalar kiritildi.
Kiritilgan o‘zgartirishlarga ko‘ra, 2021-yildan buyon xususiylashtirilayotgan davlat aktivlari ro‘yxatidan “Sijjak” va “Chotqol” dam olish maskanlari chiqarib tashlandi. “Sijjak” dala hovlisi 124-maktab-internatning balansida saqlanadi, uni sotish yoki faoliyat turini o‘zgartirish taqiqlangan. Chotqol oromgohi esa Kasaba uyushmalari federatsiyasi balansiga o‘tkazilgan.
5,38 gektar hududni egallagan “Sijjak” 2021-yil aprelda, shuningdek, 2022-yilning aprel va oktabrlarida sotuvga qo‘yilgan, biroq obyekt sotilmagan edi. Uning hududida sport inshooti, mehmonxona, uchta suzish havzasi, amfiteatr, kottej va boshqa binolar mavjud. Obyekt 70 milliard so‘mga baholangandi.
“Sijjak” oromgohi 2017-yilning 10-fevralida Jinoyat ishlari bo‘yicha Toshkent viloyati sudi ajrimi bilan musodara etilgan. Keyinchalik musodara qilingan ushbu hashamatli qarorgoh ichidagi barcha jihozlari bilan O‘zbekiston Triatlon federatsiyasiga vaqtinchalik foydalanishga berilgan edi. Ammo oxir-oqibat ushbu dam olish maskanini ommaviy savdolar orqali shaffoflik prinsipi asosida sotuvga qo‘yishga qaror qilindi.
Izoh (0)