“Daryo”da Bo‘ka tumanida faoliyat yurituvchi, ayni kunga kelib deputatlik vakolati tugatilgan, deputat daxlsizligidan mahrum bo‘lgan sobiq deputat boshqa deputatlarni “kalamush”, “xoin”, “hokim soldati” deb atagani, buning uchun javobgarlikka tortilgani maʼlum qilingandi.
Toshkent viloyati hokimi Zoir Mirzayevning Ohangaron tumanidagi sayyor qabulida bo‘lgan “Daryo” jurnalisti Xalq deputatlari tuman Kengashi deputatlarining viloyat hokimi qabulida qilgan murojaatlarini yozib olgach, javobgarlikka tortilgani aytilgan sobiq deputatni izladi. Ammo topolmagach, tahririyat deputatga ham minbar berishga tayyorligi bildirgandi.
Sobiq deputat Xurshida Obidova “Daryo” tahririyatiga kelib, viloyat hokimi qabulida unga nisbatan yangragan ayblovlar xato ekanini, aslida “kalamushlar” deganda, boshqa birovni nazarda tutganini, deputatlarga nisbatan “xoin” so‘zini qo‘llamaganini, “soldat” so‘zini esa bir nechta deputatga emas, bir nafar deputatga qarata yaxshi niyatda aytganligini maʼlum qildi. Suhbatdosh uni rasmga olishimizga, videotasvirga tushirishimizga qarshiligini bildirgach, uning fikrlarini matn ko‘rinishida keltirishni joiz deb topdik.
“Telegram’da deputatlar o‘zaro fikr almashadigan guruhimiz bor. ‘Kalamushlar’ so‘zini men tuman deputatlariga nisbatan qo‘llamaganman. Guruhda davlat rahbarining 2023-yil 16-yanvar kuni energiya resurslari taʼminoti yuzasidan o‘tkazgan yig‘ilishlari haqida yozib, o‘sha yerda holat bo‘yicha o‘zimning fikrlarimni ham yozdim. Oxirgi vaqtlarda xalqning muammolariga munosib javob topish, odamlarning mushkulini oson qilguvchi amallar qilishga ojizligimdan qiynalayotganimni yozdim. Va aynan davlat rahbari energiya tizimidagi muammolarni sanab, masʼullarni ‘kalamushlar’ deb atagani uchun, men ham shu guruhda yozgan gaplarim oxirida prezidentning shu so‘zini qo‘llab, deputatlarni emas, energiya tizimida faoliyat yurituvchi masʼullarga qarata ‘kalamushlar’ so‘zini qo‘lladim. ‘Xoin’ so‘ziga keladigan bo‘lsak, ‘Deputat xonimlar’ deb nomlangan guruhdagi gaplarimning birida deputatlarga murojaat qilib, baʼzilarni ‘xoin xonimlar, deb atasam ham’, atamadim, atasam ham deb yozdim. Lekin deputat ayollar buni o‘zlariga nisbatan ‘xoin’ so‘zi ishlatildi deb qabul qilgan. Shuningdek, deputatlarga nisbatan ‘hokim soldati’ degan atamani qo‘llashda ayblashmoqda. Men guruhda bu so‘zni faqatgina Ozoda opaga nisbatan qo‘llab, shunda ham ‘Siz ham oddiy soldatsiz’da degan mazmunda, yaxshi niyatda tilga oldim. Yaʼni urushda odatda ko‘p narsani oddiy ‘soldat’lar hal qiladi degan mazmunda, yomon maʼnoda qo‘llamadim”, — deydi sobiq deputat Xurshida Obidova mazkur ayblovlarga javob berar ekan.
Xurshida Obidova “Daryo” jurnalisti bilan suhbati davomida unga nisbatan ayblovlarda ”Xalq deputatlari tuman Kengashi kotibiyati mudirasini maʼnaviy buzuqlikda aybladi”, degan ayblovga ham to‘xtatilib, bu tuhmat deb atadi.
“Men hech qachon Inomovani maʼnaviy buzuqlikda ayblamaganman. Guruhdagi yozishmalarning birida ‘Inomovaning maʼnaviyati karyera qilish va Abbosovga xizmat qilishdan nari emasligini juda kech bilgan ekanman’, deb yozganman. Bu ayblov tuhmat”, — deydi sobiq deputat Obidova.
Xurshida Obidova mazkur suhbat davomida deputat sifatida qanday muammolarga duch kelayotgani, unga nisbatan bo‘layotgan bosimlar haqida ham gapirib berdi. “Daryo” bu mavzuga alohida to‘xtaladi.
Izoh (0)