Zelenskiy ofisi uning NATO sammitida ishtirok etishi shartini ma’lum qildi

Ukraina prezidenti Vladimir Zelenskiy agar ittifoqchi davlatlar “jasorat ko‘rsatmasa”, NATOning Vilnyusdagi sammitiga bormaydi. Bu haqda Ukraina prezidenti ofisi rahbari o‘rinbosari Igor Jovkva Reuters agentligiga ma’lum qildi. Kiyev iyul oyida bo‘lib o‘tadigan sammitda alyansga qo‘shilish jarayonini boshlashga taklif olishni kutmoqda.

“Vilnyusdagi sammit (Ukrainaning) NATOga yuborgan so‘roviga javob berish uchun juda maqbul boshlanish bo‘lardi. Javob deganda a’zolikka taklifni nazarda tutyapmiz”, — dedi Jovkva.

Uning ta’kidlashicha, “agar natija bo‘lmasa, Zelenskiyning Vilnyusdagi sammitga borishi uchun hech qanday sabab ham, vaqt ham yo‘q”.

Ukraina prezidenti vakili o‘tgan yili Shvetsiya va Finlyandiya tomonidan NATOga a’zolik uchun arizalar berilganini eslatib o‘tdi. “Ikkinchisi allaqachon alyansga qo‘shildi”, — deb ta’kidladi u.

May oyida Zelenskiy Ukraina NATOning Vilnyusdagi sammitida “ochiq eshiklar” siyosatidan ko‘ra ko‘proq narsa eshitishni xohlashini aytgandi. Shu bilan birga, Kiyev o‘z hududida janglar davom etayotgan bir paytda mamlakat alyansga qo‘shila olmasligini tushunadi, dedi u. NATO bosh kotibi Yens Stoltenberg iyun oyida bo‘lajak sammitda alyans Kiyevga aniq signal berishini va mamlakat kelajagi NATOda ekanini ochiq ko‘rsatishni va’da qildi. Shu bilan birga, u Ukrainaning g‘alabasini alyansga a’zolik bo‘yicha har qanday mazmunli muhokama uchun zarurat deb atadi. Zelenskiy Stoltenbergni Ukraina harbiylarini demotivatsiya qilishda aybladi.