Украина президенти Владимир Зеленский агар иттифоқчи давлатлар “жасорат кўрсатмаса”, НАТОнинг Вилнюсдаги саммитига бормайди. Бу ҳақда Украина президенти офиси раҳбари ўринбосари Игор Жовква Reuters агентлигига маълум қилди. Киев июль ойида бўлиб ўтадиган саммитда альянсга қўшилиш жараёнини бошлашга таклиф олишни кутмоқда.
“Вилнюсдаги саммит (Украинанинг) НАТОга юборган сўровига жавоб бериш учун жуда мақбул бошланиш бўларди. Жавоб деганда аъзоликка таклифни назарда тутяпмиз”, — деди Жовква.
Унинг таъкидлашича, “агар натижа бўлмаса, Зеленскийнинг Вилнюсдаги саммитга бориши учун ҳеч қандай сабаб ҳам, вақт ҳам йўқ”.
Украина президенти вакили ўтган йили Швеция ва Финляндия томонидан НАТОга аъзолик учун аризалар берилганини эслатиб ўтди. “Иккинчиси аллақачон альянсга қўшилди”, — деб таъкидлади у.
Май ойида Зеленский Украина НАТОнинг Вилнюсдаги саммитида “очиқ эшиклар” сиёсатидан кўра кўпроқ нарса эшитишни хоҳлашини айтганди. Шу билан бирга, Киев ўз ҳудудида жанглар давом этаётган бир пайтда мамлакат альянсга қўшила олмаслигини тушунади, деди у. НАТО бош котиби Йенс Столтенберг июнь ойида бўлажак саммитда альянс Киевга аниқ сигнал беришини ва мамлакат келажаги НАТОда эканини очиқ кўрсатишни ваъда қилди. Шу билан бирга, у Украинанинг ғалабасини альянсга аъзолик бўйича ҳар қандай мазмунли муҳокама учун зарурат деб атади. Зеленский Столтенбергни Украина ҳарбийларини демотивация қилишда айблади.
Изоҳ (0)