Ukraina prezidenti Vladimir Zelenskiyning ma’lum qilishicha, alyans aʼzolari Ukrainaning NATOga aʼzo bo‘lish masalasini orqaga surgani sababli mamlakatning umidi so‘nib bormoqda. Unga ko‘ra, kuzgacha Kiyevga nomzod maqomini olish bo‘yicha “aniq ijobiy qaror” kerak.
“Ukrainaliklar Yevropa Ittifoqi va NATOga qo‘shilish borasida aniq ijobiy javobni ko‘rmayapti. Va bizning umidlarimiz tobora so‘nib bormoqda.
Afsuski, hafsalamiz pir bo‘layotganini bu yerda izhor etishga majburman”, — dedi Ukraina prezidenti Moldovada bo‘lib o‘tayotgan Yevropa siyosiy hamjamiyatining sammitida.
Vladimir Zelenskiy 2022-yil 30-sentabrda mamlakatning NATOga tezlashtirilgan a’zoligi uchun ariza topshirgan. Shimoliy Atlantika alyansi bosh kotibi Yens Stoltenberg, agar ariza ma’qullansa, NATO o‘z ustavining beshinchi moddasiga murojaat qilishi kerakligini bir necha bor tushuntirdi: NATOga a’zo davlatga hujum qilinsa, alyansning barcha a’zolaridan javob talab qilinadi. Alyans qoidalariga ko‘ra, tugallanmagan hududiy mojarosi bo‘lgan mamlakatni qabul qilishga ruxsat berilmaydi.
Shu bilan birga, Vladimir Zelenskiy may oyida Ukraina Rossiya bilan harbiy mojaro tugamaguncha NATOga qo‘shila olmasligini tan oldi. Biroq, uning so‘zlariga ko‘ra, harbiy harakatlar tugaganidan keyin ittifoqqa qo‘shilish uchun mamlakatga kafolatlar kerak.
Izoh (0)