Samarqandda ichki ishlar xodimlari cho‘milish havzasi ochilish marosimida raqsga tushgan ayollarni OITS testi topshirishga majburlagani haqida xabarlar tarqalgandi. Ichki ishlar vazirligi matbuot xizmati holatga munosabat bildirdi.
Mazkur holat IIV tomonidan o‘rganilganda ma’lum bo‘lishicha, 16-iyun kuni Samarqand tumani “Yangiariq” mahallasida joylashgan “Vavilon” cho‘milish havzasining ochilish marosimi tashkilotchilari Vazirlar Mahkamasining 2014-yil 29-iyuldagi 205-sonli “Ommaviy tadbirlarni tashkil etish va o‘tkazish tartibini yanada takomillashtirish chora-tadbirlari to‘g‘risida"gi qarori talablarini inobatga olmagan holda 2000 dan ziyod fuqarolar uchun ommaviy ko‘ngilochar marosimni tashkil etgan.
Ushbu kelishilmagan jamoat tadbiri turli tartib buzilishlarga olib kelishi mumkinligini inobatga olgan holda, mazkur holat Samarqand viloyati IIB tomonidan o‘rganilib, tadbir tashkilotchilari bilan profilaktik suhbat o‘tkazilib, kelgusida xavfsizlik choralari ko‘rilishi zaruriyati haqida qat’iy ogohlantirilgan.
Ta’kidlanishicha, xabarda aks etgan, tadbirda ishtirok etgan ayollarga nisbatan teri-tanosil kasalliklari ko‘rigidan o‘tkazilgani va OITS/OIVga tekshirish uchun qon tahlillari olingani to‘g‘risidagi ma’lumot viloyat IIB matbuot kotibi Jahongir Sa’dullayev tomonidan shoshma-shosharlik bilan vaziyatni to‘liq o‘rganmagan holda tayyorlangan.
“Tadbir ishtirokchilarining, shu jumladan, ayollarning hech biri tibbiy ko‘rikdan o‘tkazilmagan va ularga nisbatan huquqiy ta’sir choralari qo‘llanmagan. Hozirda Ichki ishlar vazirligi tomonidan viloyat IIB xodimlarining harakatlari yuzasidan xizmat tekshiruvi tayinlangan”, — deyiladi xabarda.
Izoh (0)