Самарқандда ички ишлар ходимлари чўмилиш ҳавзаси очилиш маросимида рақсга тушган аёлларни ОITС тести топширишга мажбурлагани ҳақида хабарлар тарқалганди. Ички ишлар вазирлиги матбуот хизмати ҳолатга муносабат билдирди.
Мазкур ҳолат ИИВ томонидан ўрганилганда маълум бўлишича, 16 июнь куни Самарқанд тумани “Янгиариқ” маҳалласида жойлашган “Вавилон” чўмилиш ҳавзасининг очилиш маросими ташкилотчилари Вазирлар Маҳкамасининг 2014 йил 29 июлдаги 205-сонли “Оммавий тадбирларни ташкил этиш ва ўтказиш тартибини янада такомиллаштириш чора-тадбирлари тўғрисида"ги қарори талабларини инобатга олмаган ҳолда 2000 дан зиёд фуқаролар учун оммавий кўнгилочар маросимни ташкил этган.
Ушбу келишилмаган жамоат тадбири турли тартиб бузилишларга олиб келиши мумкинлигини инобатга олган ҳолда, мазкур ҳолат Самарқанд вилояти ИИБ томонидан ўрганилиб, тадбир ташкилотчилари билан профилактик суҳбат ўтказилиб, келгусида хавфсизлик чоралари кўрилиши зарурияти ҳақида қатъий огоҳлантирилган.
Таъкидланишича, хабарда акс этган, тадбирда иштирок этган аёлларга нисбатан тери-таносил касалликлари кўригидан ўтказилгани ва ОITС/ОИВга текшириш учун қон таҳлиллари олингани тўғрисидаги маълумот вилоят ИИБ матбуот котиби Жаҳонгир Саъдуллаев томонидан шошма-шошарлик билан вазиятни тўлиқ ўрганмаган ҳолда тайёрланган.
“Тадбир иштирокчиларининг, шу жумладан, аёлларнинг ҳеч бири тиббий кўрикдан ўтказилмаган ва уларга нисбатан ҳуқуқий таъсир чоралари қўлланмаган. Ҳозирда Ички ишлар вазирлиги томонидан вилоят ИИБ ходимларининг ҳаракатлари юзасидан хизмат текшируви тайинланган”, — дейилади хабарда.
Изоҳ (0)