“O‘zavtosanoat” rahbari Ulug‘bek Ro‘ziqulov gimnastika federatsiyasi raisi bo‘ldi

Ulug‘bek Ro‘ziqulov O‘zbekiston gimnastika federatsiyasining raisi etib saylandi. Bu haqda Milliy Olimpiya qo‘mitasi matbuot xizmati xabar berdi.

Ma’lum qilinishicha, 18-iyun kuni Milliy Olimpiya qo‘mitasida O‘zbekiston gimnastika federatsiyasining navbatdan tashqari hisobot-saylov konferensiyasi bo‘lib o‘tdi. Federatsiyaning avvalgi rahbari boshqa ishga o‘tgani munosabati bilan tashkilotga yangi rais saylash konferensiya kun tartibidagi asosiy masala bo‘ldi.

MOQ bosh kotibi Oybek Qosimov ushbu lavozimga federatsiya bosh homiysi “O‘zavtosanoat” AK boshqaruv raisi Ulug‘bek Ro‘ziqulov nomzodini ilgari surdi. Konferensiya qatnashchilari bir ovozdan ushbu nomzodni qo‘llab-quvvatladi va Ulug‘bek Ro‘ziqulov O‘zbekiston gimnastika federatsiyasi raisi etib saylandi.

2022-yilning 22-fevralidan buyon federatsiyani “O‘zavtosanoat”ning avvalgi rahbari Shavkat Umurzoqov boshqargan. 2023-yil 23-mart kuni u Toshkent shahri hokimi vazifasini bajaruvchi etib tayinlangach, “O‘zavtosanoat”ga Ulug‘bek Ro‘ziqulov rahbar bo‘ldi.