Jizzax viloyatining G‘allaorol tumanida Toshkentga sotish maqsadida olib ketilayotgan salkam 1 tonna sifatsiz go‘sht to‘xtatib qolindi. Bu haqda viloyat IIB axborot xizmati xabar berdi. 

Unga ko‘ra, G‘allaorol tumani hududidagi “Sangzor-15” yo‘l-patrul xizmati maskanida Qashqadaryo—Toshkent yo‘nalishida shubhali harakatlangan Cobalt to‘xtatilib, tekshirilgan.  Qashqadaryo viloyati Chiroqchi tumanida yashovchi, 1982-yilda tug‘ilgan fuqaro E.T. boshqaruvidagi mashinaning yukxona va salonida go‘sht mahsulotlari veterinariya-sanitariya qoidalariga zid ravishda olib ketilayotgani aniqlangan.

U mahsulotlarni poytaxtga sotish maqsadida olib ketayotgan bo‘lgan. Soha xodimlari tomonidan jami 820 kilogramm go‘sht mahsulotlari hujjatlashtirib olingan. Uning isteʼmolga yaroqliligini tekshirish maqsadida vaqtincha muzxonaga joylashtirilgan. Laboratoriya tekshiruvida go‘sht mahsulotining isteʼmolga yaroqsizligi oydinlashdi. Shundan so‘ng ushbu go‘sht mahsuloti tegishli tartibda yoqib yo‘q qilindi.