Silk Avia aviakompaniyasining Toshkent—Samarqand reysi yo‘lovchisi bortda sigaret chekkani uchun jarimaga tortildi. Bu haqda Uzbekistan Airports matbuot xizmati xabar qildi.
Hodisa 12-iyun kuni parvoz vaqtida sodir bo‘lgan. 70 yoshli ayol samolyot hojatxonasida sigaret chekishni boshlagan. Tamaki mahsulotlari hidini sezgan bort kuzatuvchilari yo‘lovchiga samolyot bortida chekish qat’iyan taqiqlanganligini tushuntirishga harakat qilgan. Bunga javoban ayol o‘z noroziligini bildirgan.
Bort kuzatuvchilari vaziyat haqida samolyot komandiriga xabar bergan va komandir Samarqandga yetib kelgach, huquq-tartibot xodimlarini chaqirishga qaror qilgan. Samolyot bortida tamaki mahsulotlarini iste’mol qilgani uchun yo‘lovchiga nisbatan huquq tartibot organi xodimlari tomonidan BHMning ikki baravari (660 ming so‘m) miqdorida jarimani nazarda tutuvchi ma’muriy bayonnoma tuzilgan.
Samolyot bortida chekish qat’iyan man etiladi. Bu Ma’muriy javobgarlik to‘g‘risidagi kodeksning 122-moddasi 2-qismi bilan tartibga solingan.
“Bundan tashqari, bortda chekish nafaqat boshqa yo‘lovchilar uchun yoqimsiz, balki juda xavfli ekanligini ham tushunish lozim. Bu samolyotda xavfli tutun chiqishi va yong‘inga olib kelishi hamda aviahalokatga sabab bo‘lishi mumkin”, — deyiladi xabarda.
Izoh (0)