Silk Avia авиакомпаниясининг Тошкент—Самарқанд рейси йўловчиси бортда сигарет чеккани учун жаримага тортилди. Бу ҳақда Uzbekistan Airports матбуот хизмати хабар қилди.
Ҳодиса 12 июнь куни парвоз вақтида содир бўлган. 70 ёшли аёл самолёт ҳожатхонасида сигарет чекишни бошлаган. Тамаки маҳсулотлари ҳидини сезган борт кузатувчилари йўловчига самолёт бортида чекиш қатъиян тақиқланганлигини тушунтиришга ҳаракат қилган. Бунга жавобан аёл ўз норозилигини билдирган.
Борт кузатувчилари вазият ҳақида самолёт командирига хабар берган ва командир Самарқандга етиб келгач, ҳуқуқ-тартибот ходимларини чақиришга қарор қилган. Самолёт бортида тамаки маҳсулотларини истеъмол қилгани учун йўловчига нисбатан ҳуқуқ тартибот органи ходимлари томонидан БҲМнинг икки баравари (660 минг сўм) миқдорида жаримани назарда тутувчи маъмурий баённома тузилган.
Самолёт бортида чекиш қатъиян ман этилади. Бу Маъмурий жавобгарлик тўғрисидаги кодекснинг 122-моддаси 2-қисми билан тартибга солинган.
“Бундан ташқари, бортда чекиш нафақат бошқа йўловчилар учун ёқимсиз, балки жуда хавфли эканлигини ҳам тушуниш лозим. Бу самолётда хавфли тутун чиқиши ва ёнғинга олиб келиши ҳамда авиаҳалокатга сабаб бўлиши мумкин”, — дейилади хабарда.
Изоҳ (0)