Misrdan С gepatitiga qarshi 13 ming donadan iborat “Daklatasvir” dori vositasining oltinchi partiyasi 10-iyun kuni Toshkentga yetkazib berildi, deb xabar bermoqda “Dunyo” AA.
Ushbu dori vositalari insonparvarlik yordam sifatida ajratilgan bo‘lib, Sog‘liqni saqlash vazirligi huzuridagi Virusologiya ilmiy-tekshirish instituti tomonidan shifotalab bemorlar o‘rtasida taqsimlanadi.
Misr sog‘liqni saqlash vazirligi bilan 2023—2024-yillar davomida umumiy qiymati 4,8 million dollar hajmidagi 800 ming dona (40 tonnaga yaqin) C gepatitiga qarshi “Daklatasvir” va “Sofosbuvir” dori vositalarini O‘zbekistonga bepul yetkazib berish bo‘yicha kelishuvlarga erishilgan.
Ushbu dori vositalarining avvalgi partiyalari 29-aprel, 6-may, 14-may, 20-may 28-may, 3-iyun kunlari yetkazib berilgandi.
Qayd etilishicha, Misr gepatit C virusiga qarshi kurashda sezilarli yutuqlarga erishgan. Misr Sog‘liqni saqlash vazirligining ma’lumotiga ko‘ra, 21—30-may kunlari Jenevada bo‘lib o‘tgan Jahon sog‘liqni saqlash tashkilotining 76-sessiyasida xabar qilinganidek, mamlakat aholisi ushbu kasallikdan butunlay xalos bo‘lgan.
Xalqaro tashkilotning mutaxassislari va ekspertlari Misrning ushbu yo‘nalishdagi yutuqlarini o‘rganib chiqib, shu yilning iyun oyida ular tegishli hisobotni e’lon qilishlari va Misr hukumatiga gepatit C virusini to‘liq yo‘q qilingani to‘g‘risida sertifikat taqdim etishlari kutilmoqda. Boshqacha qilib aytganda, yillar davomida ushbu kasallikdan aziyat chekib kelgan Misr uni mag‘lub etgan dunyodagi ilk mamlakat bo‘ladi.
Izoh (1)
6-partiyasi keganmi 7-partiyasimi to'g'ri yoziyla