Мисрдан гепатит C га қарши дори воситаларининг еттинчи партияси Ўзбекистонга олиб келинди

Мисрдан С гепатитига қарши 13 минг донадан иборат “Даклатасвир” дори воситасининг олтинчи партияси 10 июнь куни Тошкентга етказиб берилди, деб хабар бермоқда “Дунё” АА.

Ушбу дори воситалари инсонпарварлик ёрдам сифатида ажратилган бўлиб, Соғлиқни сақлаш вазирлиги ҳузуридаги Вирусология илмий-текшириш институти томонидан шифоталаб беморлар ўртасида  тақсимланади.

Миср соғлиқни сақлаш вазирлиги билан 2023—2024 йиллар давомида умумий қиймати 4,8 миллион доллар ҳажмидаги 800 минг дона (40 тоннага яқин) C гепатитига қарши “Даклатасвир” ва “Софосбувир” дори воситаларини Ўзбекистонга бепул етказиб бериш бўйича  келишувларга эришилган.

Ушбу дори воситаларининг аввалги партиялари 29 апрель, 6 май, 14 май, 20 май 28 май, 3 июнь кунлари етказиб берилганди. 

Қайд этилишича, Миср гепатит C вирусига қарши курашда сезиларли ютуқларга эришган. Миср Соғлиқни сақлаш вазирлигининг маълумотига кўра, 21—30 май кунлари Женевада бўлиб ўтган Жаҳон соғлиқни сақлаш ташкилотининг 76-сессиясида хабар қилинганидек, мамлакат аҳолиси ушбу касалликдан бутунлай халос бўлган.

Халқаро ташкилотнинг мутахассислари ва экспертлари Мисрнинг ушбу йўналишдаги ютуқларини ўрганиб чиқиб, шу йилнинг июнь ойида улар тегишли ҳисоботни эълон қилишлари ва Миср ҳукуматига гепатит C вирусини тўлиқ йўқ қилингани тўғрисида сертификат тақдим этишлари кутилмоқда. Бошқача қилиб айтганда, йиллар давомида ушбу касалликдан азият чекиб келган Миср уни мағлуб этган дунёдаги илк мамлакат бўлади.