Misr hukumati tomonidan O‘zbekiston shifoxonalarida foydalanish uchun insonparvarlik yordami sifatida ajratilgan, dunyoda keng tarqalgan kasalliklardan biri — gepatit C ga qarshi “Daklatasvir” va “Sofosbuvir” dori vositalarining uchinchi partiyasi Sharm ash-Shayxdan Toshkentga bepul yetkazib berdi, deb xabar bermoqda “Dunyo” AA.
Qayd etilishicha, mazkur aksiyani O‘zbekiston TIV, Qohiradagi O‘zbekiston elchixonasi va Uzbekistan Airways tashkil etgan bo‘lib, ushbu yukning olib kelinishi O‘zbekiston va Misr o‘rtasida sog‘liqni saqlash sohasida hamkorlikni yanada jadallashtirish, virusologiyada o‘zaro qo‘llab-quvvatlashni tashkil etish doirasida avval erishilgan kelishuvlarning amaliy natijasidir.
Umumiy qiymati 34930 dollarni tashkil etgan 17 mingdan ortiq “Daklatasvir” dori vositalari O‘zbekiston Sog‘liqni saqlash vazirligi huzuridagi Virusologiya ilmiy-tekshirish instituti tomonidan shifotalab bemorlarga taqsimlanadi.
Ta’kidlanishicha, Misr sog‘liqni saqlash vazirligi bilan 2023—2024-yillar davomida umumiy qiymati 4,8 million dollarlik jami 800 ming dona (40 tonnaga yaqin) C gepatitiga qarshi “Daklatasvir” va “Sofosbuvir” dori vositalarini yurtimizga bepul yetkazib berish bo‘yicha kelishuvlarga erishilgan.
Ushbu dori vositlarining birinchi partiyasi 29-aprel kuni, ikkinchi partiyasi 6-may kuni olib kelingandi.
Aprel boshlarida O‘zbekistonda 1 million aholi virusli gepatitning B va C turlariga qarshi skriningdan o‘tkazilishi ma’lum qilingandi. Mazkur tekshiruvlarda virusli gepatit C kasalligi tasdiqlangan 10,5 ming nafar bemorlarda davolash tadbirlari amalga oshiriladi.
Izoh (1)
Assalamu aleykum men namangan shaxarde turaman b s ge dorini qayerdan olaman kimge uchrashim kerak oldindan javob uchun katta raxmat