Misr hukumati tomonidan mamlakatimiz shifoxonalarida foydalanish uchun insonparvarlik yordami sifatida ajratilgan, dunyoda keng tarqalgan kasalliklardan biri — gepatit C ga qarshi “Daklatasvir” va “Sofosbuvir” dori vositalarining ikkinchi partiyasi Toshkent xalqaro aeroportida kutib olindi. Bu haqda “Dunyo” agentligi xabar berdi.
Qayd etilishicha, mazkur aksiyani O‘zbekiston Tashqi ishlar vazirligi, mamlakatning Qohiradagi elchixonasi va Uzbekistan Airways aviakompaniyasi tashkil etgan bo‘lib, ushbu yukning olib kelinishi O‘zbekiston va Misr o‘rtasida sog‘liqni saqlash sohasida hamkorlikni yanada jadallashtirish, virusologiyada o‘zaro qo‘llab-quvvatlashni tashkil etish doirasida avval erishilgan kelishuvlarning amaliy natijasi hisoblanadi.
Umumiy qiymati 62 ming dollarni tashkil etgan 7,7 ming dan ortiq “Daklatasvir” va “Sofosbuvir” dori vositalari O‘zbekiston Sog‘liqni saqlash vazirligi huzuridagi Virusologiya ilmiy-tekshirish instituti tomonidan shifotalab bemorlarga taqsimlanadi.
Ta’kidlanishicha, Misr sog‘liqni saqlash vazirligi bilan 2023-2024-yillar davomida umumiy qiymati 4,8 million dollarlik jami 800 ming dona (40 tonnaga yaqin) gepatit C ga qarshi “Daklatasvir” va “Sofosbuvir” dori vositalarini O‘zbekistonga bepul yetkazib berish bo‘yicha kelishuvlarga erishilgan.
May boshida ham Misr hukumati tomonidan yuborilgan “Daklatasvir” dori vositasining dastlabki partiyasi Toshkentga olib kelingandi. Aprelda esa O‘zbekistonda 1 million aholi virusli gepatitning B va C turlariga qarshi skriningdan o‘tkazilishi ma’lum qilingan edi. Mazkur tekshiruvlarda virusli gepatit C kasalligi tasdiqlangan 10,5 ming nafar bemorlarda davolash tadbirlari amalga oshiriladi.
Izoh (0)