Buxoro viloyatining Olot tumanida xotinini urib, tan jarohati yetkazgan erkakka jinoyat ishi qo‘zg‘atildi.
Viloyat IIB matbuot xizmatining ma’lum qilishicha, 24-may kuni soat 21:30 larda Olot tumanidagi mahallada yashovchi erkak D.D. (1992-yilda tug‘ilgan) yashash uyida turmush o‘rtog‘i B.S. (1993-yilda tug‘ilgan) bilan o‘zaro oilaviy kelishmovchilik sabab janjallashib qolib, janjal vaqtida xotinini urgan. Sudga oid tibbiy ekspertizasining xulosasiga ko‘ra, ayolga o‘rtacha og‘ir shikast yetkazilgan.
Mazkur holat yuzasidan tuman IIB tomonidan fuqaro D.D.ga nisbatan Jinoyat kodeksining 126-1-moddasi (oilaviy zo‘ravonlik) 4-qismi bilan jinoyat ishi qo‘zg‘atilib, dastlabki tergov harakatlari olib borilmoqda.
Ushbu moddaning 4-qismiga ko‘ra, xotiniga (eriga), sobiq xotiniga (sobiq eriga), bir ro‘zg‘or asosida birgalikda yashayotgan shaxsga yoki umumiy farzandga ega bo‘lgan shaxsga sodir etilayotgan paytda hayot uchun xavfli bo‘lmagan va ushbu moddaning oltinchi qismida nazarda tutilgan oqibatlarga olib kelmagan, lekin sog‘liqning uzoq vaqt, ya’ni kamida 21 kun, ammo 4 oydan ko‘p bo‘lmagan davrda yomonlashuviga yoki umumiy mehnat qobiliyatining 10 foizidan 33 foizigacha yo‘qolishiga sabab bo‘lgan qasddan badanga o‘rtacha og‘ir shikast yetkazish — 360 soatdan 480 soatgacha majburiy jamoat ishlari yoki 2 yildan 3 yilgacha axloq tuzatish ishlari yoxud 2 yildan 3 yilgacha ozodlikni cheklash yoki 2 yildan 3yilgacha ozodlikdan mahrum qilish bilan jazolanadi.
Izoh (0)