“Дарё”да Бўка туманида фаолият юритувчи, айни кунга келиб депутатлик ваколати тугатилган, депутат дахлсизлигидан маҳрум бўлган собиқ депутат бошқа депутатларни “каламуш”, “хоин”, “ҳоким солдати” деб атагани, бунинг учун жавобгарликка тортилгани маълум қилинганди.
Тошкент вилояти ҳокими Зоир Мирзаевнинг Оҳангарон туманидаги сайёр қабулида бўлган “Дарё” журналисти Халқ депутатлари туман Кенгаши депутатларининг вилоят ҳокими қабулида қилган мурожаатларини ёзиб олгач, жавобгарликка тортилгани айтилган собиқ депутатни излади. Аммо тополмагач, таҳририят депутатга ҳам минбар беришга тайёрлиги билдирганди.
Собиқ депутат Хуршида Обидова “Дарё” таҳририятига келиб, вилоят ҳокими қабулида унга нисбатан янграган айбловлар хато эканини, аслида “каламушлар” деганда, бошқа бировни назарда тутганини, депутатларга нисбатан “хоин” сўзини қўлламаганини, “солдат” сўзини эса бир нечта депутатга эмас, бир нафар депутатга қарата яхши ниятда айтганлигини маълум қилди. Суҳбатдош уни расмга олишимизга, видеотасвирга туширишимизга қаршилигини билдиргач, унинг фикрларини матн кўринишида келтиришни жоиз деб топдик.
“Telegram’да депутатлар ўзаро фикр алмашадиган гуруҳимиз бор. ‘Каламушлар’ сўзини мен туман депутатларига нисбатан қўлламаганман. Гуруҳда давлат раҳбарининг 2023 йил 16 январь куни энергия ресурслари таъминоти юзасидан ўтказган йиғилишлари ҳақида ёзиб, ўша ерда ҳолат бўйича ўзимнинг фикрларимни ҳам ёздим. Охирги вақтларда халқнинг муаммоларига муносиб жавоб топиш, одамларнинг мушкулини осон қилгувчи амаллар қилишга ожизлигимдан қийналаётганимни ёздим. Ва айнан давлат раҳбари энергия тизимидаги муаммоларни санаб, масъулларни ‘каламушлар’ деб атагани учун, мен ҳам шу гуруҳда ёзган гапларим охирида президентнинг шу сўзини қўллаб, депутатларни эмас, энергия тизимида фаолият юритувчи масъулларга қарата ‘каламушлар’ сўзини қўлладим. ‘Хоин’ сўзига келадиган бўлсак, ‘Депутат хонимлар’ деб номланган гуруҳдаги гапларимнинг бирида депутатларга мурожаат қилиб, баъзиларни ‘хоин хонимлар, деб атасам ҳам’, атамадим, атасам ҳам деб ёздим. Лекин депутат аёллар буни ўзларига нисбатан ‘хоин’ сўзи ишлатилди деб қабул қилган. Шунингдек, депутатларга нисбатан ‘ҳоким солдати’ деган атамани қўллашда айблашмоқда. Мен гуруҳда бу сўзни фақатгина Озода опага нисбатан қўллаб, шунда ҳам ‘Сиз ҳам оддий солдатсиз’да деган мазмунда, яхши ниятда тилга олдим. Яъни урушда одатда кўп нарсани оддий ‘солдат’лар ҳал қилади деган мазмунда, ёмон маънода қўлламадим”, — дейди собиқ депутат Хуршида Обидова мазкур айбловларга жавоб берар экан.
Хуршида Обидова “Дарё” журналисти билан суҳбати давомида унга нисбатан айбловларда ”Халқ депутатлари туман Кенгаши котибияти мудирасини маънавий бузуқликда айблади”, деган айбловга ҳам тўхтатилиб, бу туҳмат деб атади.
“Мен ҳеч қачон Иномовани маънавий бузуқликда айбламаганман. Гуруҳдаги ёзишмаларнинг бирида ‘Иномованинг ма’навияти карьера қилиш ва Аббосовга хизмат қилишдан нари эмаслигини жуда кеч билган эканман’, деб ёзганман. Бу айблов туҳмат”, — дейди собиқ депутат Обидова.
Хуршида Обидова мазкур суҳбат давомида депутат сифатида қандай муаммоларга дуч келаётгани, унга нисбатан бўлаётган босимлар ҳақида ҳам гапириб берди. “Дарё” бу мавзуга алоҳида тўхталади.
Изоҳ (0)