Toshkent shahar Uchtepa tumanidagi 62-sonli maktabning informatika fani o‘qituvchisi 8-iyun kuni maktab o‘quvchisi va uning oila a’zolari tomonidan kaltaklangani haqida xabar tarqaldi.
Mazkur xabarga O‘zbekiston Respublikasi Prezidenti Administratsiyasi rahbarining o‘rinbosari Komil Allamjonov munosabat bildirib, bu ishni qilganlar kim bo‘lishidan qat’i nazar qonunda belgilangan tartibda qattiq jazolanishini ma’lum qildi.
“Toshkent shahar Uchtepa tumanidagi 62-sonli maktabning informatika fani o‘qituvchisini kaltaklashda ishtirok etgan kimki bo‘lsa, ularning barchasi qonunda belgilangan tartibda qattiq jazolanadi. Bu bo‘yicha huquq-tartibot organlariga kerakli ko‘rsatmalar berildi. Vallamati bo‘lsa ham o‘qituvchini xafa qilishga hech kimning haqqi yo‘q” — deb yozdi Komil Allamjonov.
Kun.uz’ning voqea yuzasidan qilgan so‘roviga javoban Maktabgacha va maktab ta’limi vaziri Hilola Umarova ham munosabat bildirdi. Jumladan, vazirlik matbuot xizmatining vazir munosabati, deya taqdim etgan izohida aytilishicha, ayni paytda holat yuzasidan IIB surishtiruv ishlarini olib bormoqda.
“Holatni shaxsan o‘zim nazoratga oldim. Aybdorlarning qilmishiga yarasha jazo olishi bo‘yicha chora ko‘rilishi ta’minlanadi. Maktab va o‘qituvchiga nisbatan bunday munosabatda bo‘linishiga yo‘l qo‘ymaymiz”, – deyiladi vazir munosabatida.
Izoh (0)