Samarqandda yakshanba, dam olish kuni telefon qo‘ng‘iroqlariga javob bermagani uchun xodimlaridan tushuntirish xati talab qilgan va yozdirgan mansabdor — agentlikning Samarqand viloyati boshqarmasi boshlig‘i 1 million 650 ming so‘m jarimaga tortildi. Bu haqda Samarqand viloyati Kambag‘allikni qisqartirish va bandlik bosh boshqarmasi axborot xizmati xabar berdi.
Taʼkidlanishicha, boshqarmaning Davlat mehnat nazorat inspeksiyasi Yoshlar ishlari agentligining Samarqand viloyati boshqarmasi boshlig‘i xatti-harakatini o‘rgangan.
.jpg)
“O‘tkazilgan o‘rganish davomida boshqarma boshlig‘i 2023-yil 21-may, haftaning yakshanba dam olish kuni ish yuzasidan Kattaqo‘rg‘on va Paxtachi tumanlarida bo‘lib, tumanda bo‘lgan vaqtda agentlikning Kattaqo‘rg‘on va Paxtachi tumanlari bo‘lim boshliqlaridan Yoshlarning mahallabay yo‘l xaritalari bo‘yicha olib borilayotgan ishlar holatini bilish maqsadida izlagan va ularning telefon raqamlariga bog‘lana olmagan. Shundan so‘ng 2023-yilning 23-may, dushanba kuni boshqarma boshlig‘i boshqarmaning kadrlar bo‘lim boshlig‘iga Yoshlar ishlari agentligining Kattaqo‘rg‘on va Paxtachi tumani rahbarlaridan yakshanba kuni telefoni o‘chirilgani yuzasidan tushuntirish xati olish to‘g‘risida topshiriq bergan va tashkilot rahbari nomiga ushbu tuman bo‘limlari rahbarlarining tushuntirish xatlari talab qilib olingan.
Mehnat kodeksining 209-moddasida dam olish kunlarida va ishlamaydigan bayram kunlarida ishlash taqiqlanishi, agarda kutilmagan qaysi bir ishlarning shoshilinch bajarilishiga bog‘liq bo‘lsa, o‘sha ishni bajarish uchun dam olish kunlari va ishlamaydigan bayram kunlari ishga jalb etish ularning yozma roziligi bilan amalga oshirilishi belgilab qo‘yilgan”, — deyiladi boshqarma axborotida.
Mazkur holat uchun Yoshlar ishlar agentligi Samarqand viloyati boshqarmasi boshlig‘iga Maʼmuriy javobgarlik to‘g‘risidagi kodeksining 49-moddasi 1-qismida nazarda tutilgan (mansabdor shaxs tomonidan mehnat va mehnatni muhofaza qilish to‘g‘risidagi qonunchilikni buzish) huquqbuzarlikni sodir qilgan degan ayblov qo‘yilib, Kambag‘allikni qisqartirish va bandlik bosh boshqarmasi Davlat mehnat nazorat inspeksiyasi tomonidan unga nisbatdan bazaviy hisoblash miqdorining 5 baravari miqdorida, 1 million 650 ming so‘m maʼmuriy jarima qo‘llangan.
Avvalroq Yoshlar ishlari agentligi direktori Alisher Saʼdullayev “Daryo” so‘roviga javoban boshqarma boshlig‘ining ushbu harakati noqonuniy ekanini aytgandi. Ko‘p o‘tmay agentlik masʼullari boshqarma boshlig‘iga nisbatan ogohlantirish jazosi qo‘llanganini maʼlum qilgandi.
Izoh (0)