Yoshlar ishlari agentligi yakshanba kuni telefon qo‘ng‘iroqlariga javob bermagani uchun xodimlaridan tushuntirish xati talab qilgan va yozdirgan mansabdori — agentlikning Samarqand viloyati boshqarmasi boshlig‘iga ogohlantirish berdi. Bu haqda “Daryo”ga agentlik axborot xizmati xabar berdi.
“Amaldagi qonunchilik hujjatlari hamda yangi tahrirdagi Mehnat kodeksiga binoan xodimlarni dam olish kunlari mehnatga jalb qilish taqiqlangan. Yoshlar ishlari agentligi tizimida faoliyat yuritayotgan barcha xodimlarning dam olish kunlarida dam olishi va oila davrasida bo‘lishi qadrlanadi. Yuqoridagilarni inobatga olib, tashkilotning Samarqand viloyati boshqarmasi rahbari xizmat faoliyati tahlil qilinib, yakshanba dam olish kuni bo‘lishiga qaramasdan, mehnat intizomiga amal qilmagani uchun qatʼiy ogohlantirildi”, — deyiladi agentlikning rasmiy munosabatida.
Agentlik axborot xizmati mazkur holatga eʼtiborsiz bo‘lmagan jamoatchilik vakillari va OAVga minnatdorlik izhor qilgan.
“Faoliyatimizga befarq bo‘lmagan barcha OAV, jamoatchilik vakillari va mustaqil blogerlarga o‘z minnatdorchiligimizni bildiramiz”, — deyiladi agentlik masʼullari rasmiy axborotida.
Izoh (0)