Самарқандда якшанба, дам олиш куни телефон қўнғироқларига жавоб бермагани учун ходимларидан тушунтириш хати талаб қилган ва ёздирган мансабдор — агентликнинг Самарқанд вилояти бошқармаси бошлиғи 1 миллион 650 минг сўм жаримага тортилди. Бу ҳақда Самарқанд вилояти Камбағалликни қисқартириш ва бандлик бош бошқармаси ахборот хизмати хабар берди.
Таъкидланишича, бошқарманинг Давлат меҳнат назорат инспекцияси Ёшлар ишлари агентлигининг Самарқанд вилояти бошқармаси бошлиғи хатти-ҳаракатини ўрганган.
.jpg)
“Ўтказилган ўрганиш давомида бошқарма бошлиғи 2023 йил 21 май, ҳафтанинг якшанба дам олиш куни иш юзасидан Каттақўрғон ва Пахтачи туманларида бўлиб, туманда бўлган вақтда агентликнинг Каттақўрғон ва Пахтачи туманлари бўлим бошлиқларидан Ёшларнинг маҳаллабай йўл хариталари бўйича олиб борилаётган ишлар ҳолатини билиш мақсадида излаган ва уларнинг телефон рақамларига боғлана олмаган. Шундан сўнг 2023 йилнинг 23 май, душанба куни бошқарма бошлиғи бошқарманинг кадрлар бўлим бошлиғига Ёшлар ишлари агентлигининг Каттақўрғон ва Пахтачи тумани раҳбарларидан якшанба куни телефони ўчирилгани юзасидан тушунтириш хати олиш тўғрисида топшириқ берган ва ташкилот раҳбари номига ушбу туман бўлимлари раҳбарларининг тушунтириш хатлари талаб қилиб олинган.
Меҳнат кодексининг 209-моддасида дам олиш кунларида ва ишламайдиган байрам кунларида ишлаш тақиқланиши, агарда кутилмаган қайси бир ишларнинг шошилинч бажарилишига боғлиқ бўлса, ўша ишни бажариш учун дам олиш кунлари ва ишламайдиган байрам кунлари ишга жалб этиш уларнинг ёзма розилиги билан амалга оширилиши белгилаб қўйилган”, — дейилади бошқарма ахборотида.
Мазкур ҳолат учун Ёшлар ишлар агентлиги Самарқанд вилояти бошқармаси бошлиғига Маъмурий жавобгарлик тўғрисидаги кодексининг 49-моддаси 1-қисмида назарда тутилган (мансабдор шахс томонидан меҳнат ва меҳнатни муҳофаза қилиш тўғрисидаги қонунчиликни бузиш) ҳуқуқбузарликни содир қилган деган айблов қўйилиб, Камбағалликни қисқартириш ва бандлик бош бошқармаси Давлат меҳнат назорат инспекцияси томонидан унга нисбатдан базавий ҳисоблаш миқдорининг 5 баравари миқдорида, 1 миллион 650 минг сўм маъмурий жарима қўлланган.
Аввалроқ Ёшлар ишлари агентлиги директори Алишер Саъдуллаев “Дарё” сўровига жавобан бошқарма бошлиғининг ушбу ҳаракати ноқонуний эканини айтганди. Кўп ўтмай агентлик масъуллари бошқарма бошлиғига нисбатан огоҳлантириш жазоси қўлланганини маълум қилганди.
Изоҳ (0)