Surxondaryo viloyatining 6 ta tumanidagi g‘allakorlar O‘zbekistonda birinchi bo‘lib g‘alla rejasini bajardi. Bu haqda “Daryo”ga viloyat hokimligi axborot xizmati xabar berdi.

Taʼkidlanishicha, joriy yil hosili uchun Angorda 6500, Bandixonda 4688, Jarqo‘rg‘onda 7877, Qiziriqda 10190, Muzrabotda 10700 va Termiz tumanida 2900 gektar maydonda mahalliy iqlim va tuproq sharoitiga mos, ertapishar va serhosil navli urug‘lar ekilgan.

“Hosilni qisqa fursatlarda yig‘ishtirib olish ishlari oqilona tashkil etilishi natijasida joriy yil 1-iyun holatiga Angorda 9171, Bandixonda 13520, Jarqo‘rg‘onda 18131, Qiziriqda 23437, Muzrabotda 23609 va Termiz tumanida 5809 tonna don yig‘ib olinib, reja mamlakatimizda birinchi bo‘lib ortig‘i bilan bajarildi”, — deydi hokimlik axborot xizmati rahbari Murodbek Davlatov.

Taʼkidlanishicha, o‘rib olingan maydonlarda o‘rtacha hosildorlik 77-80 sentnerni tashkil etgan.

“Ilg‘or fermer xo‘jaliklari tomonidan bir gektar g‘alla maydonidan 100 sentnergacha hosil olinishiga erishildi. Ko‘tarilgan xirmonga tumanlarda faoliyat yuritayotgan klasterlar va fermer xo‘jaliklari birdek katta hissa qo‘shdi. Hozirda viloyat bo‘ylab qolgan maydonlardagi hosilni yig‘ishtirib olish ishlari qizg‘in davom etmoqda”, — deydi masʼul.

Qo‘shimcha qilinishicha, bugun viloyat hokimligida o‘tkazilgan tadbirda viloyat hokimi Ulug‘bek Qosimov belgilangan rejani mamlakatda birinchi bo‘lib bajargan 6 ta tumanning sektor rahbarlari, eng ilg‘or fermer xo‘jaliklari va klasterlar rahbarlarini erishilgan natija bilan tabriklab, ularning samarali mehnatlarini rag‘batlantirish maqsadida viloyat hokimligining sovg‘alarini topshirgan.