Yoshlar ishlari agentligining Samarqand viloyati boshqarmasi boshlig‘i Husan To‘xtayev yakshanba kuni telefon qo‘ng‘irog‘iga javob bermagan xodimlari — agentlikning Paxtachi va Kattaqo‘rg‘on tumani bo‘limi boshliqlaridan tushuntirish xati oldi. Bu haqda jamoatchilikka dastlab samarqandlik jurnalist va bloger Farhod Norbo‘tayev xabar berdi. “Daryo” mazkur vaziyatni o‘rgandi.
.jpg)
Tahririyat jurnalisti bilan suhbatda bo‘lgan Yoshlar ishlari agentligining Paxtachi hamda Kattaqo‘rg‘on tumani bo‘limi boshliqlari rahbarining dam olish kuni qilgan telefon qo‘ng‘irog‘iga javob bermagani uchun tushuntirish xati yozganini tan oldi.
“Mendan yakshanba kuni nega telefoningiz ishlamadi deb so‘rashdi. Izohlash uchun o‘z xohishim bilan tushuntirish xati yozib berdim”, — dedi “Daryo” jurnalistining bu haqdagi savollariga javob bergan agentlikning Kattaqo‘rg‘on tumani bo‘limi rahbari Lazizbek Abduqahhorov.
Tushuntirish xati yozgan ikkinchi masʼul — agentlikning Paxtachi tumani bo‘limi rahbari Elyorbek Sanaqulov esa undan tushuntirish xati so‘ragan masʼuldan huquqini talab qilganini, “shugina sabab uchun tushuntirish xati yozishim shartmi”, deb savol berganini bildirmoqda.
“Bir necha oydan beri yakshanba kuniga shaxsiy ishlarimni reja qilib qo‘ygandim. Shu sabab dam olish kuni tog‘li hududda bo‘lganim bois, telefonim ishlamay qoldi. ‘Shugina sabab uchun ham tushuntirish xati yozishim shartmi‘, deb so‘radim. Otdelkadr ‘rahbar talab qilyapti, yozing‘, degach yozib berdim”, — deydi Elyorbek Sanaqulov.
Elyorbek Sanaqulovning qo‘shimcha qilishicha, boshqarma boshlig‘i yakshanba kuni Paxtachi tumaniga taʼziyaga borgan bo‘lgan.
Holat haqida jamoatchilikka oshkor qilgan jurnalist va bloger Farhod Norbo‘tayev ham taʼziya masalasida alohida to‘xtalgan va taʼziyadan chiqqan rahbarning baliq yegisi kelganini yozgan.
“Bittasi aytyapti, jigit ta’ziyadan qaytayotgan bo‘lgan. To‘xta, bitta baliq yeyay degan. Paxtachidan odamini izlagan topmagan. So‘ng Kattaqo‘rg‘ondan odamini izlagan. Uni ham topolmagan”, — deb yozadi mazkur voqea davomini yozgan muallif.
“Mansabdor xodimlarini baliqxo‘rlik uchun ham yo‘qlagan bo‘lishi mumkin. Ammo bu taxmin deydi”, — jurnalist Farhod Norbo‘tayev “Daryo” jurnalisti bilan bu haqda suhbatlashar ekan.
Yoshlar ishlari agentligining Samarqand viloyati boshqarmasi axborot xizmati rahbari Charos Saidova jurnalistning bu gapini inkor etib, rahbari o‘sha kuni uyida bo‘lganini maʼlum qildi.
“Boshqarma boshlig‘i o‘sha kuni uyda bo‘lgan. Maʼlumotlarni to‘playotganda shu ikki tuman bilan bog‘liq tezkor maʼlumot kerak bo‘lib qolgan. Va shu sabab agentlikning ikki rahbarini izlagan va telefon qilgan. Topolmagach, dushanba kuni nega telefoni ishlamagani sababini so‘ragan. Bunga javoban ikki tuman masʼuli tushuntirish xati yozib bergan. Ammo ulardan tushuntirish xati so‘ralmagan”, — deydi Charos Saidova.
Yoshlar ishlari agentligi direktori Alisher Saʼdullayev “Daryo”ning bu haqdagi so‘roviga javob berar ekan, mazkur holatda boshqarma boshlig‘i ham, tuman bo‘limi rahbarlari ham xato qilganini aytmoqda.
“Bu holat jamoatchilikni qiziqtirib, tarmoqlarda keng muhokama qilinganini ko‘rib xursand bo‘ldim. Demak, biz o‘z haq-huquqimizni bilib, uni talab qilishga o‘tyapmiz. Haqiqatan ham dam olish kunlarida ishlash, rahbar talabini bajarish qonunga zid. Boshqarma boshlig‘i qonunni buzgan, tumandagi rahbarlarimiz ham bu holatda huquqini talab qilmay xato qilgan. Ular ‘yakshanba kuni mening dam olish vaqtim, shu sabab hech qachon tushuntirish xati yozmayman’, deb javob berishi kerak edi. Biz har doim, barcha xodimlarimizga tushuntirib kelganmiz. Dam olish kunlari qonunga ko‘ra, dam olish, hech kimni bezovta qilmang deganmiz. Bundan xulosa chiqarganlari chiqaryapti. Xulosa qilishmasa, ogohlantiryapmiz, undayam qonunni buzishda davom etsa, keyin chora ko‘rishga majburmiz”, — deydi Alisher Saʼdullayev.
Agentlik direktorining qo‘shimcha qilishicha, agenlik bu holat yuzasidan tez orada rasmiy maʼlumot ham beradi.
Izoh (0)