Yevropaga bu yil qurg‘oqchilik xavf solmoqda. Bu Yevropa Ittifoqining janubiy mamlakatlari – Ispaniya, Portugaliya va Fransiyaga eng ko‘p ta’sir ko‘rsatyapti, Italiya toshqinlardan ham aziyat chekmoqda. Boltiqbo‘yi va Skandinaviyada esa tuproq namligi kamaygan, deyiladi Euronews xabarida.
Janubiy Yevropa jazirama mavsum boshlanishiga va buning ortidan qishloq xo‘jaligiga zarar yetkazuvchi qurg‘oqchilik kuchayishiga tayyorgarlik ko‘rmoqda. Eng ko‘p zarar ko‘rgan YI davlatlari moliyaviy yordam so‘rayapti, xususan, o‘ta og‘ir paytlarda fermerlarga yordam uchun “Agrar zaxira”dan 450 million yevro miqdorida mablag‘ ajratiladi.
“Bu yil biz Ispaniya misolida, gidrologik yil boshidan beri yog‘ingarchilik 30 foizdan ko‘proqqa kamayganini ko‘ryapmiz. Bu yaylovlarda chorva boqishga bevosita ta’sir ko‘rsatadi. Hali yig‘ib olinmagan qishki ekinlarga, shuningdek, bahorgi ekinlarga ham ta’sir qiladi. Sug‘orish amaliyoti ham o‘zgargan, chunki suv hajmi kamaygan”, — dedi Ispaniya qishloq xo‘jaligi, baliqchilik va oziq-ovqat vaziri Luis Planas Puchades.
Bryusseldagi YI vazirlari yig‘ilishida Fransiya, Italiya va Ispaniya nomidan Portugaliya tomonidan taqdim etilgan hisobot vaziyat tashvishli ekanini ko‘rsatdi. Aprel oyi oxirida Yevropa Ittifoqining 21,6 foizi “qurg‘oqchilikdan ogohlantirish”, 3,2 foizi esa “trevoga” holatida bo‘lgan.
Yomg‘ir tanqisligidan eng ko‘p Ispaniya va Portugaliya zarar ko‘rmoqda. Boltiqbo‘yi va Skandinaviya mamlakatlarida tuproq namligi odatdagidan pasaygan.
Ispaniyada 2022-yil 1-oktabrdan 2023-yil 25-aprelgacha o‘rtacha ko‘rsatkichdan 24 foiz kam yog‘ingarchilik kuzatildi, Fransiyadagi 101 ta departamentdan 26 tasi yoz oxirigacha qurg‘oqchilik xavfi ostida. Bu Portugaliyaning qishloq xo‘jaligi faoliyatiga ham salbiy ta’sir ko‘rsatdi.
Izoh (0)