Rossiya sobiq prezidenti, amaldagi Xavfsizlik kengashi rahbari o‘rinbosari Dmitriy Medvedev o‘zining Twitter’dagi sahifasida Buyuk Britaniyaning istalgan amaldori Rossiyaning qonuniy harbiy nishoni sifatida ko‘rilishi mumkinligini yozdi.
Medvedev Britaniya tashqi ishlar vaziri Jeyms Kleverlining Kiyev o‘zini himoya qilish va Rossiyaning Ukrainaga zarba berish qobiliyatiga putur yetkazish uchun o‘z chegaralaridan tashqarida kuch ishlatishga haqli, degan so‘zlariga shunday javob qaytargan. Kleverli bunday tvitni Moskvaga dronlar hujumidan keyin yozgandi.
Medvedev o‘zining “qonuniy harbiy nishonlar” haqidagi bayonotini izohlar ekan, “zamonaviy urush olib borishni tartibga soluvchi umume’tirof etilgan xalqaro huquq” doirasida Buyuk Britaniya Rossiya bilan urushayotgan davlat sifatida tasniflanishi mumkinligini aytdi.
Bugungi kunda Buyuk Britaniya Ukrainaning ittifoqchisi bo‘lib, unga texnika va mutaxassislar ko‘rinishida harbiy yordam ko‘rsatmoqda, ya’ni amalda Rossiyaga qarshi e’lon qilinmagan urush olib bormoqda. Bunday holda, uning har qanday mansabdor shaxsi qonuniy harbiy nishon deb hisoblanishi mumkin.
30-may kuni ertalab Moskvadagi uchta ko‘p qavatli uyga dronlar kelib urildi. Binolar vayron bo‘lgan, ikki kishi tibbiy yordamga murojaat qilgan.
Rossiya Mudofaa vazirligi va Tashqi ishlar vazirligi hujumda Ukrainani ayblab, voqeani “terakt” deb atadi. O‘z navbatida, prezident Vladimir Putin Moskvaga uchuvchisiz uchoqlar hujumi “ikki-uch kun avval” Rossiyaning Ukraina harbiy razvedka boshqarmasiga bergan zarbasiga javob ekanini aytdi.
Rossiya Tergov qo‘mitasi terakt moddasi bo‘yicha jinoiy ish qo‘zg‘atdi. Ukraina rasmiylari hujumga aloqadorligini rad etmoqda.
Izoh (0)